٢٨٣ : شعبہ نے اپنی اسناد سے حضرت عائشہ (رض) سے روایت نقل کی ہے۔ وہ کہتے ہیں اس سے منی کے نجس ہونے کی دلالت مل گئی ‘ اس کے جواب میں اسے کہا جائے گا کہ جو کچھ آپ ذکر کر رہے ہیں اس میں اس کی کوئی دلیل نہیں ہے کیونکہ بقول آپ کے اگر ان کے ہاں اس کا حکم پیشاب ‘ پائخانہ ‘ خون والا ہے تو وہ ضرور تمام کپڑے کو دھونے کا حکم کرتیں اس لیے کہ اس کی جگہ نامعلوم تھی۔ ذرا آپ خود غور فرمائیں کہ اگر کسی کپڑے کو پیشاب کے قطرات پہنچ جائیں اور اس کی جگہ مخفی ہو تو اس پر فقط پانی کا بہا دینا اس کو پاک نہیں کرسکتا بلکہ پورے کپڑے کو دھونا ضروری ہے تاکہ نجاست سے اس کا پاک ہونا ظاہر ہوجائے۔ جب منی کا حکم حضرت عائشہ صدیقہ (رض) کے ہاں فقط پانی بہا دینا ہے جبکہ کپڑے میں اس کی جگہ معلوم نہ ہو ‘ اس سے یہ بات ثابت ہوگئی کہ ان کے ہاں اس کا حکم تمام نجاستوں سے مختلف ہے اور جناب رسول اللہ (صلی اللہ علیہ وآلہ وسلم) کے صحابہ کا بھی اس میں اختلاف روایات میں آیا ہے۔
مالکیہ کہتے ہیں کہ ان روایات سے ثابت ہوتا ہے کہ فی نفسہٖ منی ان کے ہاں ناپاک ہے۔
S: ان روایات میں تو نجاست منی کی دلیل نہیں پائی جاتی اس کی دلیل یہ ہے کہ اگر منی کا حکم بھی ان کے ہاں دیگر نجاسات بول و براز اور خون کی طرح ہوتا تو وہ نجاست کا مقام معلوم نہ ہونے کی وجہ سے تمام کپڑے کو دھونے کا حکم فرمائیں کیونکہ جب کسی کپڑے کو پیشاب لگ جائے اور اس کی جگہ یقینی طور پر معلوم نہ ہو تو اس سارے حصے یا سارے کپڑے کو دھونا لازم ہے تاکہ نجاست سے اس کے پاک ہونے کا یقین ہوجائے۔
مگر یہاں منی لگنے کا مقام نامعلوم ہونے کی صورت میں انھوں نے نضح کا حکم دیا ہے پس اس سے یہ امر واضح ہوگیا کہ اس کا حکم ان کے ہاں دیگر نجاسات کی طرح نہیں ہے۔
آسان توضیح :
یہ کہ کپڑا اپنے اصل کے لحاظ سے پاک ہے اور اس پر یقین ہے اور نجاست کا معاملہ مشکوک ہے اور شک سے یقین بدل نہیں سکتا اس لیے انھوں نے پانی چھڑکنے کا حکم رفع وساوس کے لیے کیا ہے۔
ایک وضاحت :
منی کے سلسلہ میں صحابہ کرام (رض) کے درمیان اختلاف رائے پایا جاتا ہے مندرجہ روایات اس بات کو ثابت کرتی ہیں۔