٢٩٢: عبدالکریم بن رشید کہتے ہیں کہ حضرت انس بن مالک (رض) سے اس چادر کے متعلق دریافت کیا گیا جس کو جنابت لگ جائے مگر جگہ معلوم نہ ہو تو فرمایا اس چادر کو دھو ڈالے۔ امام طحاوی (رح) فرماتے ہیں کہ جب اس مسئلہ میں یہ اختلاف ہے اور جناب رسول اللہ (صلی اللہ علیہ وآلہ وسلم) سے مروی روایات میں کوئی دلیل بھی اس کے حکم کو ثابت نہیں کرتی کہ وہ کیا ہے ؟ تو اب ہم نے غور و فکر سے اس کو جانچا تو ہمیں یہ معلوم ہوا کہ منی کا نکلنا سخت قسم کے احداث میں سے ہے کیونکہ اس سے سب سے بڑی طہارت کا استعمال لازم ہوجاتا ہے اب ہمیں ان اشیاء کو دیکھنا چاہیے جن کا نکلنا باعث حدث ہے کہ ان کا حکم ذاتی لحاظ سے کیا ہے۔ چنانچہ ہم نے پیشاب و پاخانہ کے نکلنے کو حدیث ہونا معلوم کرلیا اور یہ دونوں ذاتی لحاظ سے گندگی ہیں ‘ اسی طرح حیض و استحاضہ بھی حدث ہیں اور وہ ذاتی لحاظ سے پلید ہیں اور غور کرنے سے رگوں کا خون بھی یہی حکم رکھتا ہے۔ پس جب یہ بات ثابنت ہوچکی کہ جس چیز کا نکلنا حدث ہو وہ ذاتی لحاظ سے نجس ہے اور یہ بات تو ثابت ہوچکی کہ منی کا نکلنا حدث ہے تو اس سے یہ بات بھی ثابت ہوگئی کہ یہ ذاتی طور پر نجس ہے۔ غور و فکر کا یہی تقاضا ہے ‘ البتہ ہم نے اس کے رگڑنے کو جب کہ وہ خشک وہ مباح قرار دیا اور یہ آپ (صلی اللہ علیہ وآلہ وسلم) کے ارشادات کے اتباع کے پیش نظر ہے۔ یہی امام ابوحنیفہ ‘ امام ابو یوسف اور محمد (رح) کا قول ہے۔
تخریج : مصنف ابن ابی شیبہ کتاب الطھارۃ ١؍٨٣۔
حضرت جابر بن عبداللہ اور انس بن مالک (رض) کے ارشادات سے یہی معلوم ہوتا ہے کہ منی ناپاک ہے اس کا دھونا ضروری ہے۔
حاصل روایات یہ ہے :
کہ حضرت ابن عباس (رض) کے فتویٰ سے منی کا پاک ہونا معلوم ہوتا ہے اور حضرت عمر (رض) ، ابوہریرہ (رض) ، جابر بن سمرہ (رض) ، انس بن مالک (رض) کے فتاویٰ جات سے اس کا ناپاک ہونا ظاہر ہوتا ہے اور حضرت سعد اور عبداللہ بن عمر (رض) کے اقوال میں ہر دو قول کی گنجائش ہے جب صحابہ کرام (رض) کے مابین یہ اختلاف پایا گیا اور کوئی صریح قولی روایت جناب نبی اکرم (صلی اللہ علیہ وآلہ وسلم) سے وارد نہیں تو اب کسی فیصلہ پر پہنچنے کے لیے ہمیں نظر و فکر کی ضرورت ہے۔
طحاوی کی نظری دلیل :
جسم سے نکلنے والی ان چیزوں کا جائزہ لیا جو کہ حدث کا باعث بنتی ہیں چنانچہ پائخانہ ‘ پیشاب ‘ حیض کا اور استحاضہ ‘ نفاس کا خون ‘ رگوں سے نکلنے والا خون ‘ یہ تمام خود بھی نجس ہیں اور حدث کا باعث ہیں تو یہ بات نظری طور پر ثابت ہوگئی کہ جس چیز کا خروج باعث حدث ہو وہ نجس ہے اور یہ بات تو مسلم ہے کہ منی کا خروج حدث کا قوی باعث ہے تو یہ بات خود ثابت ہوگئی کہ وہ بذات خود بھی نجس ہے اس امت کے لیے احکام کے سلسلہ میں آسانی کی گئی اس لیے جب وہ خشک ہوجائے تو اس کے کھرچ دینے سے سہولت کے لیے کپڑے کو پاک قرار دیا گیا اور وہ روایات میں موجود ہے اس کی اتباع ضروری ہے۔
یہی ہمارے ائمہ امام ابوحنیفہ ‘ ابو یوسف و محمد (رح) کا قول ہے۔