٢٩٢١: عبداللہ بن وہب نے امّ سلمہ ام المؤمنین (رض) سے نقل کیا کہ جناب رسول اللہ (صلی اللہ علیہ وآلہ وسلم) نے صدقہ کی بکریاں تقسیم کیں اور ایک بکری زینب ثقفیہ (رض) کو بھیجی تو زینب ثقفیہ نے اس کا گوشت ہماری طرف بطور ہدیہ بھیجا پس جناب رسول اللہ (صلی اللہ علیہ وآلہ وسلم) ہمارے ہاں تشریف لائے اور فرمایا کیا تمہارے ہاں کوئی ایسی چیز موجود ہے جو تم ہمیں کھلاؤ؟ ہم نے عرض کی اللہ کی قسم ! یارسول اللہ (صلی اللہ علیہ وآلہ وسلم) ہمارے پاس کوئی چیز نہیں آپ نے فرمایا کیا میں نے وہ گوشت نہیں دیکھا جو تمہارے ہاں بھیجا گیا ہم نے عرض کی یارسول اللہ (صلی اللہ علیہ وآلہ وسلم) ! وہ اسی بکری کا گوشت ہے جو زینب کو بطور صدقہ دی گئی تھی اور آپ صدقہ نہیں کھاتے ہم نے پسند نہ کیا کہ ہم اس چیز کو اپنے پاس روک رکھیں جس کو آپ استعمال نہیں فرماتے جناب رسول اللہ (صلی اللہ علیہ وآلہ وسلم) نے فرمایا اگر میں اسے پا لیتا تو ضرور کھاتا۔ پس جب بریرہ (رض) پر کیا جانے والا صدقہ آپ (صلی اللہ علیہ وآلہ وسلم) پر حلال ہے۔ آپ نے اس کو استعمال فرمایا کیونکہ ہدیہ کے سبب آپ اس کے مالک بن گئے تو ہاشمی کے لیے بھی جائز ہے کہ وہ صدقات سے تنخواہ حاصل کرے وہ اپنے عمل کی وجہ سے اس کا مالک بن جائے گا ۔ صدقہ کے سبب نہیں ۔ نظر کے اعتبار سے یہی حکم ہے اور وہ اس سے زیادہ درست ہے جس کو امام ایوسف (رح) نے اختیار کیا۔
حاصل روایات اور نظر طحاوی (رض) : ان روایات سے جناب رسول اللہ (صلی اللہ علیہ وآلہ وسلم) کا خود اس گوشت کا کھانا مذکور ہے جو صدقہ سے تھا پھر جس پر صدقہ کیا گیا اس نے ہدیہ کردیا آپ نے اس کو استعمال فرمایا تو جب بریرہ (رض) پر صدقہ کی جانے والی چیز کا نبی اکرم (صلی اللہ علیہ وآلہ وسلم) کے لیے استعمال کرنا جائز ہے کیونکہ تبدل ملک سے حکم میں تبدیلی آگئی تو بالکل اسی طرح ہاشمی کو عامل بن جانے کی صورت میں تنخواہ درست ہوگی کیونکہ وہ اپنے عمل کے بدلے اس کا مالک بنا ہے۔ نظر کا تقاضا بھی یہی ہے پس فریق ثانی کا مؤقف امام ابو یوسف (رح) کے مؤقف سے زیادہ مضبوط اور مدلل ہے۔ اور امام طحاوی (رح) کا اس میں رجحان بھی اسی طرف معلوم ہوتا ہے۔ صاحب درمختار نے امام ابو یوسف (رح) کے قول کو راجح کہا ہے واللہ اعلم۔
نسیبہ یہ ام عطیہ بنت کعب (رض) کا نام ہے بڑی شان والی صحابیہ ہیں زینب ثقفیہ یہ حضرت عبداللہ بن مسعود (رض) کی زوجہ محترمہ کا نام ہے۔