٢٩٢٩: ابو غسان نے ابوبکر بن عیاش سے پھر انھوں نے اپنی اسناد سے روایت نقل کی ہے۔ امام طحاوی (رح) فرماتے ہیں علماء کی ایک جماعت کہتی ہے کہ صدقہ تندرست و صحت مند طاقت والے آدمی کو دینا درست نہیں اور انھوں نے اس مالدار کی طرح قرار دیا اور آثار بالا سے استدلال کیا ۔ ان کی اس بات سے علماء کی دوسری جماعت نے اختلاف کیا اور فرمایا فقرخواہ صحت مند ہو یا اپاہج اس کے لیے صدقہ حلال ہے۔ انھوں نے ان آثار متقدمہ کی تاویل کرتے ہوئے کہا کہ جناب رسول اللہ (صلی اللہ علیہ وآلہ وسلم) کے ارشاد گرامی لا تحل الصدقہ لذی مرۃ سوی الحدیث کا مطلب یہ ہے کہ صدقہ اس کے لیے اس طرح جائز نہیں جس طرح ایک اپاہج کے لیے جائز ہے جو کہ کمانے کی قدرت نہیں رکھتا اور حاجت مند ہونے کی بناء پر لیتا ہے اور وہ ہر اعتبار سے محتاج ہے۔ پس جو شخص صحت مند اور طاقتور ہے وہ حالت صدقہ میں اپاہج فقیر کی طرح نہیں اس کے لیے تو اپاہج ہونا کمانے کی قدرت نہ ہونے کی بناء پر صدقہ حلال ہے اور تندرست فقیر کے لیے صرف محتاجی کی وجہ سے حلال ہے۔ اگرچہ صدقہ تو دونوں کے لیے حلال ہے مگر تندرست و صحت مند کے لیے بہتر یہ ہے کہ وہ صدقہ نہ لے بلکہ اپنے کام سے کمائی کر کے کھائے یہ افضل و بہتر ہے۔ بعض اوقات مختلف احکام میں اس لیے سختی اختیار کی جاتی ہے اور یہ کہہ دیا جاتا ہے کہ یہ حلال نہیں (کہ اس کے لیے بہتر ہوتا) یا اس وجہ اس میں حلال ہونے کے اسباب پورے نہیں اگرچہ اسباب پورے نہ ہونے کی صورت میں اسے صدقہ لینا درست ہے۔ چنانچہ آپ (صلی اللہ علیہ وآلہ وسلم) کا یہ ارشاد اسی قسم سے ہے۔ لیس المسکین بالطواف ولا بالذی تردہ ۔۔۔پس وہ مسکین جو لوگوں سے سوال کرے وہ اسباب مسکینی سے نہ تو خارج ہے اور نہ اس کے احکام سے الگ کر کے کہ یہ کہا جائے کہ اس کو صدقہ لینا حلال نہیں اور دینے والے کا صدقہ بھی نہیں ہوگا بلکہ اس کا مطلب یہ ہے۔ کہ وہ ایسا مسکین نہیں ہے کہ جس میں مسکینی کے اسباب کامل طور پر موجود ہوں ۔ پس اسی طرح یہ ارشاد لا تحل الصدقۃ لذی مرۃ سوی) کا مطلب یہ ہے کہ اس کے لیے تمام اسباب حلت کے اعتبار سے حلال نہیں اگرچہ ان میں سے سے بعض اسباب کے پائے جانے کی وجہ سے صدقہ اس کو حلال ہو۔ اول قول کے قائلین نے اپنے استدلال کے لیے ان روایات کو بھی اختیار کیا جو ذیل میں ہیں۔
حاصل روایات : صحت مند تنوتوش والے فقیر کو صدقہ واجبہ دینا جائز اور حلال نہیں ہے۔
ہر فقیر جو تندرست ہو یا لولالنگڑا اس کو صدقہ واجبہ زکوۃ وغیرہ حلال ہے مندرجہ روایات کا پہلے جواب ذکر کریں گے پھر دلائل نقل کریں گے۔
الجواب : لاتحل الصدقۃ لذی مرۃ اس کا معنی یہ ہے کہ یہ صدقہ اس کے لیے ہر اعتبار سے اس طرح درست نہیں جس طرح اپاہج کو دیا جانے والا صدقہ کیونکہ وہ تمام اعتبارات سے سے مستحق ہے اور فقط فقیر ہونے کی وجہ سے حقدار بنا ہے اس کو کمانے کی قوت حاصل نہیں جبکہ اس کو وہ قوت حاصل ہے اگرچہ اس کا لے لینا اس کو درست ہے مگر افضل یہ ہے کہ وہ نہ لے بلکہ اپنی کمائی کے مال سے کھائے اور ایسے مواقع میں سختی کے طور پر لایحل کا لفظ استعمال کیا گیا اسی طرح لایکون کذا کا لفظ بھی استعمال ہوتا ہے جس سے یہ اشارہ کرنا مقصود ہوتا ہے کہ اس شے میں یہ سارے اسباب نہیں ہیں اگرچہ بعض اسباب کی وجہ سے وہ چیز درست ہے جیسا کہ اس روایت میں جناب رسول اللہ (صلی اللہ علیہ وآلہ وسلم) نے لیس المسکین الحدیث کہہ کر در در پھرنے والے اور مانگنے کے عادی شخص سے مسکینی کی نفی فرمائی ہے حالانکہ ظاہری اسباب میں سے اکثر اسباب تو اس میں جمع ہیں مگر بعض نہ پائے جانے سے مسکنت کی نفی فرمائی حالانکہ یہاں مقصود اس عادت کی جو صلہ شکنی ہے جو گداگری کی صورت میں نمایاں ہے حقیقی مسکین اس کو قرار دیا گیا جو بالکل سوال نہ کرے بلکہ اپنی مسکنت کو چھپائے پھرتا ہے اب اس روایت میں لیس المسکین سے یہ ہرگز مراد نہیں کہ اس کو صدقہ لینا حلال نہیں یا اس کو صدقہ دینا جائز نہیں گویا کمال مسکنت کی نفی مراد ہے بالکل اسی طرح لا تحل الحدیث کی نفی سے کامل اسباب حلت کی نفی ہے۔