٢٩٦٢: ابو سعیدالمقبری نے ابوہریرہ (رض) سے انھوں نے جناب رسول اللہ (صلی اللہ علیہ وآلہ وسلم) سے اسی طرح روایت نقل کی ہے۔ امام طحاوی (رح) فرماتے ہیں کہ حضرت ابوہریرہ (رض) نے اس روایت میں واضح کردیا کہ جناب رسول اللہ (صلی اللہ علیہ وآلہ وسلم) نے اپنے ارشاد ” تصدقی “ میں صدقہ نفلی کا ارادہ فرمایا جو کہ گناہوں کا کفارہ بنتا ہے۔ اور ان کی روایت میں ہے فجاءت بجلی لھا الی رسول اللہ (صلی اللہ علیہ وآلہ وسلم) فقالت یا رسول اللہ خذ ھذا اتقرب بہ الی اللہ عزوجل والی رسولہ فقال لھا رسول اللہ (صلی اللہ علیہ وآلہ وسلم) تصدقی بہ علی عبداللہ وعلی بنیہ فانھم لہ موضع) زینب اپنے تمام زیورات لے کر جناب رسول اللہ (صلی اللہ علیہ وآلہ وسلم) کی خدمت میں حاضر ہوئی اور کہنے لگیں یا رسول اللہ ان زیورات سے میں اللہ تعالیٰ اور اس کے رسول کا قرب حاصل کرنا چاہتی ہوں ۔ تو ان کو جناب رسول اللہ (صلی اللہ علیہ وآلہ وسلم) نے فرمایا اس کو ابن مسعود اور اس کی اولاد پر صرف کرو وہ اس کے خرچ کا محل ہیں۔ تو یہ تمام زیورات صدقہ نفلیہ ہی ہوسکتا ہے۔ زکوۃ نہیں ہوسکتی کیونکہ زکوۃ میں تمام مال کا خرچ لازم نہیں ہوتا بلکہ اس کے (چالیسویں) حصہ کا خرچ لازم ہے۔ یہ اس بات کی دلیل ہے کہ امام ابو یوسف (رح) اور دیگر حضرات جو ان کے حامی ہیں ان کا پہلی روایت سے یہ استدلال غلط ہے اور جو ہم نے مذکورہ بحث کی ہے اس سے اس حدیث زینب (رض) کے متعلق یہ کہی گئی بات باطل ہوگئی کہ عورت اپنے خاوند کو جب کہ وہ محتاج ہو زکوۃ دے سکتی ہے۔ اب ہم اس کا حکم نظر و فکر سے تلاش کرتے ہیں اور اصول کے شواہد سے اسے جانچتے ہیں۔ پس ہم نے دیکھا کہ بالا تفاق عورت کو اس کا خاوند زکوۃ نہیں دے سکتا۔ اگرچہ وہ محتاج ہو ۔ وہ اس سلسلہ میں دیگر عورتوں کی طرح نہیں کیونکہ ہم نے دیکھا کہ بہن اگر محتاج ہو تو اس کا بھائی اسے زکوۃ دے سکتا ہے۔ اگرچہ اس کی ذمہ داری ہے کہ وہ بہن پر خرچ کرے مگر اس کے باوجود وہ ان لوگوں سے نہیں نکلتی جن کو زکوۃ دی جاتی ہے۔ پس اس سے یہ بات ثابت ہوگئی کہ بیوی کو خاوند کے زکوۃ دینے سے رکاوٹ یہ بات نہیں کہ خاوند پر اس کا خرچہ لازم ہے۔ بلکہ اصل وجہ ان کے مابین زکوۃ سے مانع وہ رشتہ ازدواج ہے جو کہ اس نسبی رشتہ کی طرح بن گیا جو اس کے اور والدین کے مابین ہے اور ان کو زکوۃ دینے سے مانع ہے۔ اگرچہ وہ محتاج ہوں۔ اور اسی طرح والدین بھی اپنی زکوۃ اولاد کو نہیں دے سکتے اگرچہ وہ محتاج ہی کیوں نہ ہو۔ پس یہ نسبی رشتہ بیٹے کے لیے مانع ہے کہ وہ والدین کو زکوۃ دے اور والدین کے لیے حارج ہے کہ وہ اپنی اولاد کو زکوۃ دیں۔ پس اسی طرح وہ سبب جو میاں بیوی میں پایا جاتا ہے جب مرد کے لیے مانع ہے کہ وہ عورت کو اپنی زکوۃ دے تو وہ عورت کے لیے بھی مانع ہے کہ وہ اپنی زکوۃ شوہر کو دے اور ہم دیکھتے ہیں کہ یہی سبب میاں بیوی کے مابین اس بات سے مانع ہے کہ ایک کی گواہی دوسرے کے حق میں قبول کی جائے ‘ اس سلسلے میں وہ دونوں ذی رحم محرم کی طرح قرار دیئے گئے ہیں وہ ذی رحم کہ جن کی گواہی ایک دوسرے کے لیے جائز نہیں۔ اور ہم نے یہ بھی دیکھا کہ انھوں نے جو ایک دوسرے کو ھبہ کیا ہو ایک دوسرے کی طرف نہ لوٹا دیں گے ۔ یہ ان لوگوں کے نزدیک ہے جو اقرباء کے مابین ھبہ کے رجوع کو جائز قرارد یتے ہیں جب میاں بیوی اس حال میں ہوئے اور ان کو ذی رحم محرم کی طرح عدم قبول شہادت میں قرار دیا گیا۔ اور ھبہ کے رجوع میں بھی ۔ تو قیاس کا تقاضہ یہ ہے کہ ایک دوسرے کو زکوۃ دینے میں وہ یہی حکم رکھتے ہیں۔ نظر کا تقاضایہی ہے اور یہی امام ابوحنیفہ (رح) کا یہی مسلک ہے۔
س تفصیلی روایت سے ثابت ہوگیا تصدقی سے نفلی صدقہ جس سے سیئات کا کفارہ ہو وہی مراد ہے زکوۃ تو خود فرض ہے اور ایک روایت میں فجاءت بحلی لھا الی رسول اللہ الحدیث کہ وہ اپنے زیورات لے کر آپ کی خدمت میں آئیں اور کہنے لگیں یارسول اللہ (صلی اللہ علیہ وآلہ وسلم) یہ زیورات لے لیں اس سے میں اللہ تعالیٰ اور اس کے رسول کا قرب حاصل کرنا چاہتی ہوں۔
جناب رسول اللہ (صلی اللہ علیہ وآلہ وسلم) نے اس کو فرمایا اس کو تم عبداللہ اور اس کی اولاد پر صرف کرو وہ اس کے حقدار ہیں۔ یہ فرمان ان تمام زیورات سے متعلق ہے اور یہ نفلی صدقہ ہی ہوسکتا ہے زکوۃ نہیں بن سکتی کیونکہ زکوۃ میں مال کا چالیسواں حصہ دیا جاتا ہے کل مال نہیں دیا جاتا۔ اس سے بھی امام ابو یوسف (رح) وغیرہ کی تاویل کا غلط ہونا ثابت ہوتا ہے اس سے یہ قول تو بالکل غلط ثابت ہوگیا کہ عورت اپنی زکوۃ اپنے خاوند یا اولاد کو دے حضرت زینب (رض) کی روایت میں اس کی کوئی دلیل نہیں ہے۔

نظر طحاوی (رض) :
اب ہم اصول کے مزید شواہد تلاش کرتے ہیں تاکہ اس کے لحاظ سے ہم استدلال کرسکیں چنانچہ اس بات پر سب کو متفق پایا گیا ہے کہ خاوند اپنی بیوی کو زکوۃ نہیں دے سکتا خواہ فقیر و محتاج ہو کیونکہ عورت کا حکم اس سلسلے میں دوسروں کی طرح نہیں ہے جیسا کہ بہن کو اس کا بھائی جب کہ وہ فقیرہ ہو تو دے سکتا ہے اگرچہ بھائی کا حق بنتا ہے کہ وہ اپنی بہن پر خرچ کرے اس حق خرچہ کے باوجود وہ مستحقین سے خارج نہیں ہوتی۔
اس سے یہ بات ثابت ہوئی کہ خاوند کو زکوۃ اپنی بیوی کو دینا اس لیے ممنوع نہیں کہ خاوند کے ذمہ اس کا خرچہ لازم ہے بلکہ اس کا سبب وہ رشتہ روجیت ہے جو دونوں کے مابین پایا جاتا ہے پس بیوی بھی ان نسبی رشتوں کی طرح ہوگئی جو ممانعت زکوۃ میں رشتہ نسب کی وجہ سے شامل ہوتے ہیں ان کا فقر ان کو اس کیزکوۃ کا حقدار نہیں بنا سکتا۔
جب یہ بات ثابت ہوچکی کہ خاوند کی زکوۃ عورت پر اسی وجہ سے نہیں لگ سکتی کیونکہ ان میں رشتہ زوجیت پایا گیا خواہ وہ عورت فقیرہ کیوں نہ ہو اور اس سبب نے ان میں ولدیت والے سبب کا مفہوم پیدا کردیا کہ خواہ والد کتنا غریب ہو بیٹا اس کو زکوۃ نہیں دے سکتا دوسری طرف والدین بھی اپنی زکوۃ بیٹے کو نہیں دے سکتے جبکہ وہ فقیر ہو کیونکہ یہاں بھی رشتہ نسب ہی زکوۃ کے دینے میں مانع ہے بالکل اسی طرح بیوی اور خاوند میں بھی رشتہ زوجیت عورت کی زکوۃ کے لیے مانع ہے کہ وہ خاوند کو دے سکے۔
نظیر نظر یا دلیل آخر :
خاوند اور بیوی میں رشتہ زوجیت اس بات سے مانع ہے کہ ان میں سے کسی کی گواہی دوسرے کے حق میں قابل قبول نہیں اس میں ان کو ذی رحم محرم کی طرح قرار دیا گیا ہے جن میں سے کسی کی شہادت دوسرے کے خلاف یا حق میں قابل قبول نہیں۔ اور وہ لوگ جو ہبہ میں رجوع کے قائل ہیں وہ بھی ذی رحم کے درمیان رجوع ہبہ کے قائل نہیں ہیں پس جب قبول اور شہادت میں یہ ذی رحم کی طرح ہیں تو نظر کا تقاضہ یہ ہے کہ ہر ایک زکوۃ دینے میں بھی ماں باپ اور بیٹے کی طرح قرار پائیں گے۔
یہ نظر و نظیر کا تقاضا ہے۔
امام ابوحنیفہ (رح) کا یہی قول ہے۔
نوٹ : اس باب میں پیش کیا جانے والا اختلاف جواز اور عدم جواز کا ہے امام طحاوی (رح) نے فریق اوّل کی دلیل پیش کر کے پھر اس کا جواب اور فریق ثانی کے نقل و عقل سے دلائل پیش کئے ہیں بلکہ نظر کی نظیر پیش کر کے بھی بات کو مزید روشن کیا ہے امام طحاوی (رح) کا اپنا رجحان بھی فریق ثانی کا قول معلوم ہوتا ہے۔