٢٩٧١: ابو اسحاق نے حارثہ بن مضرب سے نقل کیا کہ میں نے حضرت عمر (رض) کے ساتھ حج کیا جب اہل شام کے شرفا آپ سے ملے تو انھوں نے کہا اے امیرالمؤمنین (رض) ہمارے بہت سے چوپائے اور مال ہیں آپ ہمارے اموال سے صدقہ وصول کر کے ان مالوں کو پاک کردیں اور وہ ہمارے لیے پاکیزگی اور نمو کا باعث بنے اس پر عمر (رض) نے فرمایا یہ کام مجھ سے پہلے دونوں ہستیوں نے نہیں کیا لیکن تم انتظار کرو میں اصحاب رسول اللہ (صلی اللہ علیہ وآلہ وسلم) سے اس سلسلہ میں استفسار کرتا ہوں انھوں نے ان سے سوال کیا ان میں علی (رض) بھی تھے سب نے کہا ٹھیک ہے مگر حضرت علی (رض) خاموش تھے ان کے ساتھ جواب میں شریک نہ ہوئے حضرت عمر (رض) نے پوچھا ! ابوالحسن تم کیوں بات نہیں کرتے ؟ انھوں نے جواب میں کہا انھوں نے آپ کو مشورہ دے دیا اور جو انھوں نے کہا اس میں کوئی حرج نہیں ہے اگر یہ واجبی حکم نہ ہو اور نہ جزیہ مقررہ ہو جو ان سے لیا جاتا ہے حارثہ کہتے ہیں کہ انھوں نے ہر غلام پر دس اور ہر گھوڑے پر دس درہم اور مختلط نسل گھوڑے پر آٹھ اور فارسی گھوڑے اور خچر پر پانچ پانچ درہم سالانہ اور ان کو ہر ماہ خالص نسل گھوڑے پر دس درہم ‘ مختلط نسل گھوڑے کے لیے آٹھ اور فارسی گھوڑے اور خچر پھر پانچ خچر کے لیے پانچ درہم ماہانہ اور غلام کو دو جریب جو ہر ماہ دینے کرنے کا حکم فرمایا۔ یہ روایت اس بات پر دلالت کرتی ہے کہ عمر (رض) نے ان سے جو اپنے طور پر لیا تھا وہ زکوۃ نہ تھی بلکہ وہ زکوۃ کے علاوہ صدقہ تھا اور وصول کرنے سے پہلے حضرت عمر (رض) نے ان کو فرمایا یہ وہ عمل ہے جو کہ مجھے سے پہلے دو ہستیوں نے نہیں کیا یعنی جناب رسول اللہ (صلی اللہ علیہ وآلہ وسلم) اور ابوبکر (رض) ۔ اس سے یہ دلالت مل گئی کہ جناب رسول اللہ (صلی اللہ علیہ وآلہ وسلم) اور ابوبکر (رض) نے گھوڑوں کی زکوۃ نہیں لی اور جو حضرت عمر (رض) نے فرمایا اس کا بھی کسی صحابی (رض) نے انکار نہیں کیا اور حضرت علی (رض) نے حضرت عمر (رض) کو جو بات فرمائی وہ اس بات پر دلالت کرتی ہے۔ قداشارو اعلیک ان لم یکن جزیۃ راتبۃ وخراجاً واجبام ( صحابہ کرام نے آپ کو مشورہ دیا ہے (اس کو لے لیا جائے) اگر یہ بطور واجب جزیہ اور خراج کے نہ ہو اور حضرت عمر (رض) کا اس کو قبول کرنا اس بات کو ثابت کرتا ہے کہ حضرت عمر (رض) نے ان سے ان کے مطالبے پر لیا تھا کہ ان سے وصول کر کے اس کو صدقات میں شامل کرلیں اور ان کو اس کے روکنے کا اختیار تھا جب بھی ان کو پسند ہو ۔ پھر حضرت عمر (رض) نے غلاموں کے سلسلہ میں یہی راہ اختیار فرمائی اور یہ اس بات کی دلیل نہیں کہ تجارت کے علاوہ غلاموں پر صدقہ لازم ہے۔ آپ نے تو ان کے اموال سے جو کچھ لیا وہ نفلی صدقہ اور عطیہ کے طور پر تھا اور حضرت علی (رض) نے بھی جناب رسول اللہ سے اسی طرح کی بات نقل کی ہے کہ میں نے تم سے گھوڑوں اور غلاموں کی زکوۃ معاف کردی
اس روایت سے ثابت ہو رہا ہے کہ حضرت عمر (رض) نے جو مقرر کیا وہ زکوۃ نہیں تھی بلکہ اس کے علاوہ صدقہ تھا۔
اور عمر (رض) نے ان کو فرمایا یہ فعل مجھ سے پہلے دونوں ہستیوں نے نہیں کیا اس سے بھی یہ ثابت ہوتا ہے کہ یہ صدقہ جناب ابوبکر (رض) نے ان سے وصول نہیں کیا اور عمر (رض) نے صحابہ کرام کی موجودگی میں یہ بات کہی اور ان پر کسی نے نکیر نہیں فرمائی اور زکوۃ تو اللہ تعالیٰ کا فریضہ ہے اس کو جناب رسول اللہ (صلی اللہ علیہ وآلہ وسلم) اور ابوبکر (رض) نے کبھی نہیں چھوڑا۔
اسی طرح علی (رض) کا قول کہ ان کا مشورہ صائب ہے بشرطیکہ یہ خراج لازمہ اور مقررہ جزیہ نہ ہو اور عمر (رض) نے بھی ان کے مطالبے پر ان سے لیا خود لاگو نہیں کیا اور صدقات کے مواقع میں اس کو صرف کیا اور ان کو اپنی مرضی کے مطابق روکنے کی اجازت دی پھر عمر (رض) نے گھوڑوں اور غلاموں میں ایک ہی طریقہ اختیار فرمایا اور یہ اس بات کی دلیل نہیں کہ وہ غلام جو تجارت کے لیے نہ ہو ان میں زکوۃ لازم ہے بلکہ یہ تو ان کے آقاؤں کی طرف سے بطور تبرع تھا اور اس سلسلے میں حضرت علی (رض) کی روایت جو انھوں نے جناب نبی اکرم (صلی اللہ علیہ وآلہ وسلم) سے نقل فرمائی وہ واضح ثبوت ہے جناب رسول اللہ (صلی اللہ علیہ وآلہ وسلم) نے فرمایا میں نے گھوڑوں اور غلاموں کا صدقہ تم سے معاف کردیا۔
تخریج : ابو داؤد فی الزکوۃ باب ٥‘ نمبر ١٥٧٤‘ ترمذی فی الزکوۃ باب ٣‘ نمبر ٦٢٠‘ نسائی فی الزکوۃ باب ١٨‘ ابن ماجہ فی الزکوۃ باب ٤‘ دارمی فی الزکوۃ باب ٧‘ مسند احمد ١‘ ١٨؍١١٢‘ ١٤٨؍١٤٦‘ ١٣٢؍١٤٥۔