٢٩٩٦: زہری نے ابوبکر بن محمد بن عمرو بن حزم سے انھوں نے اپنے والد اور اپنے دادا سے نقل کیا کہ جناب رسول اللہ (صلی اللہ علیہ وآلہ وسلم) نے اہل یمن کے نام ایک خط لکھا اس میں فرائض و سنن دونوں کو ذکر فرمایا اس میں یہ بھی لکھا صدقات میں بہت بوڑھا جانور اور عیب دار جانور اور جفتی نر نہ لیا جائے اسی طرح جناب رسول اللہ (صلی اللہ علیہ وآلہ وسلم) اور ابوبکر و عمر ] کے خطوط اور علی (رض) کے خطوط چلتے رہے۔ اس سے یہ دلالت مل گئی کہ حضرت صدیقہ (رض) کی روایت میں جو کچھ مذکور ہے جو کہ اس باب کے شروع میں لکھا گیا ہے وہ منسوخ ہے۔ نیز اس سے یہ بات بھی معلوم ہوتی ہے کہ حضرت صدیقہ (رض) نے جو فرمایا۔ کہ ” ان رسول اللہ کان یبعث مصدقا فی صدر الاسلام فامرہ بذلک “ کہ جناب رسول اللہ (صلی اللہ علیہ وآلہ وسلم) شروع اسلام میں مصدق کو بھیجتے اور اس کو حکم دیتے یہ منسوخ ہے اور یہ حضرت ابوبکر صدیق (رض) کے خط اور حضرت عمرو بن حزم (رض) کے خطوط میں مذکورہ احکام سے منسوخ ہوا۔ یہ امام ابوحنیفہ ‘ ابو یوسف ‘ محمد (رح) کا یہی قول ہے۔
نوٹ : روایت عائشہ (رض) جو مذکور ہے یہ خطوط اس کے نسخ کی دلیل ہیں اور اسی روایت میں خود صراحت موجود ہے کہ یہ بات بالکل ابتدائی دور کی بات ہے صدیق اکبر (رض) اور عمرو بن حزم (رض) کے خطوط اس کے بعد ہیں وہ اس قول کے منسوخ ہونے کا ثبوت ہیں یہ اوپر جو ہم ذکر کر آئے یہ امام ابوحنیفہ ‘ ابو یوسف ‘ محمد رحمہم اللہ تعالیٰ کا قول ہے۔
مویشیوں کے متعلق نصاب میں ذرا سی تفصیل ہے اونٹوں کا نصاب ٥ پر ایک بکرے سے شروع ہوتا ہے ایک سو بیس میں دو حقے لازم آتے ہیں بشرطیکہ سائمہ ہوں گائے اور بھینس میں بیس نصاب ہے اور اس پر ایک سال کا بچھڑا لازم ہے پھر ساٹھ میں دو تبیعے ہیں پھر دس پر فریضہ بدلتا رہے گا بکریوں کا نصاب چالیس پر ایک بکرا پھر ایک سو بیس کے بعد دو بکریاں لازم ہوں گی جن لوگوں کے جانور چرنے میں اکٹھے ہوں تو نصاب میں وہ الگ الگ شمار ہوں گے اور جو ملک میں مشترک ہوں ان پر مشترک طور پر صدقہ لیا جائے گا الگ الگ کر کے نصاب کو ضائع نہ کیا جائے گا۔
نوٹ : اس باب میں نسخ و غیر نسخ کا اختلاف ہے اور حضرت عمرو بن حزم (رض) کو یہ خط کیونکہ وفات سے تھوڑا عرصہ پہلے لکھا گیا اس لیے اس کے مندرجات اس سے ماقبل کے یقیناً ناسخ ہوں گے کیونکہ زمانہ ناسخ و منسوخ کی واضح تعیین ہے۔