٣٠٩: ام کلثوم نے حضرت عائشہ (رض) سے روایت نقل کی کہ ایک آدمی نے جناب رسول اللہ (صلی اللہ علیہ وآلہ وسلم) سے ایک ایسے آدمی کے متعلق سوال کیا جو اپنے گھر والوں سے جماع کرے اور پھر انزال کے بغیر عورت سے الگ ہوجائے کیا اس پر غسل ہوگا اس وقت حضرت عائشہ (رض) بیٹھی تھیں آپ نے فرمایا میں اور یہ مجامعت کرتے ہیں پھر ہم غسل کرتے ہیں۔ ان علماء نے کہا کہ یہ آثار جناب رسول اللہ (صلی اللہ علیہ وآلہ وسلم) کے بارے میں یہ خبر دے رہے ہیں کہ آپ جماع کے بعد غسل فرماتے ‘ خواہ انزال نہ ہو۔ ان کے جواب میں کہا جائے گا کہ یہ آثار جناب رسول اللہ (صلی اللہ علیہ وآلہ وسلم) کا ایک فعل بتلاتے ہیں اور یہ ممکن ہے کہ آپ (صلی اللہ علیہ وآلہ وسلم) ایک ایسا فعل کریں جو آپ (صلی اللہ علیہ وآلہ وسلم) پر لازم نہ ہو اور پہلے آثار اس کی خبر دیتے ہیں کہ جو آپ (صلی اللہ علیہ وآلہ وسلم) پر لازم ہے اور لازم نہیں پس وہ اختیار کرنے میں اولیٰ ہیں۔ دوسرے قول والوں کی دلیل پہلے قول والوں کے خلاف یہ ہے کہ جن آثار کو ہم نے اس باب کی فصل اوّل میں نقل کیا اس کی دو قسمیں ہیں ایک قسم تو یہ ہے : ((الماء من المائ)) کہ پانی پانی سے ہے نہ اور کچھ یعنی انزال کی صورت میں غسل ہے اور دوسری قسم کے آثار وہ ہیں جن میں جناب رسول اللہ (صلی اللہ علیہ وآلہ وسلم) نے فرمایا غسل اسی پر ہے جس کو انزال ہو۔ رہی وہ روایت جس میں پانی پانی سے ہے کا تذکرہ ہے تو ابن عباس (رض) نے اس سے اور مراد بیان کی ہے جو پہلے قول والوں کے خلاف ہے ‘ چنانچہ روایات ملاحظہ ہوں۔
تخریج : مسلم فی الحیض روایت ٨٩‘ ١٥٦
خلاصہ روایات :
ان روایات سے یہ بخوبی طور پر معلوم ہوگیا کہ جب آپ جماع کرتے خواہ انزال ہو یا نہ ہو آپ غسل فرماتے تھے۔
اشکال : فقیل لھم سے ان چھ روایات سے متعلق اشکال پیش کر رہے ہیں فعل رسول اللہ (صلی اللہ علیہ وآلہ وسلم) سے غسل کا ثبوت جماع کے بعد مل گیا مگر عین ممکن ہے کہ آپ بطور فضیلت ایسا کرتے ہوں غسل واجب نہ ہو اور پہلی روایات تو وجوب و عدم وجوب دونوں کو ظاہر کر رہی ہیں۔
فریق ثانی کی طرف سے جواب :
شروع میں پیش کی جانے والی روایات دو قسم پر مشتمل ہیں۔
قسم اول :
میں صاف مذکور ہے کہ جب انزال نہ ہو تو جماع کرنے والے پر غسل نہیں۔
قسم دوم :
دوسری روایات میں الماء من الماء مذکور ہے مگر ابن عباس (رض) نے فرمایا اس کا تعلق احتلام سے ہے کہ اگر کوئی خواب میں جماع کرتا دیکھے مگر کپڑے پر کوئی چیز نہ پائے تو اس پر غسل نہیں وہ روایت یہ ہے۔