٣١٨٥: بکر و صالح نے اپنی روایات میں اپنے والد سے نقل کیا انھوں نے عقبہ اور انھوں نے جناب نبی اکرم (صلی اللہ علیہ وآلہ وسلم) سے نقل کیا کہ ایام اضحی اور ایام تشریق اور یوم عرفہ یہ سب عید کے ایام ہیں اہل اسلام کے لیے کھانے پینے کے دن ہیں۔ امام طحاوی (رح) فرماتے ہیں کہ بعض علماء نے اس روایت کو اختیار کرتے ہوئے کہا کہ عرفہ کے دن کا روزہ مکروہ ہے اور اس کو وہ بوم نحر کے روزے کی طرح قرار دیتے ہیں۔ دیگر علماء نے ان سے اختلاف کرتے ہوئے فرمایا کہ عرفہ کے دن کا روزہ رکھنے میں کوئی حرج نہیں ۔ ان کی دلیل یہ ہے کہ یہ عین ممکن ہے کہ جناب رسول اللہ (صلی اللہ علیہ وآلہ وسلم) کی مراد میدان عرفات میں روزہ رکھنے کی ممانعت ہو ۔ کیونکہ وہاں وہ عید کی ہے جب کہ دوسرے مقامات پر اس طرح نہیں اور حضرت ابوہریرہ (رض) نے اس کو اسی طرح بیان فرمایا روایت ملاحظہ ہو۔
تخریج : مسلم فی الصیام نمبر ١٤٢‘ ابو داؤد فی الاضافی باب ١٠‘ ترمذی فی الصوم باب ٥٨‘ نسائی فی الحج باب ١٥٣‘ والفرع والعتیرۃ باب ٢‘ والایمان باب ٧‘ ابن ماجہ فی الصیام باب ٣٥‘ دارمی فی الصوم باب ٤٧‘ موطا مالک نمبر ١٣٥‘ مسند احمد ٤؍١٥٢‘ ٥؍٧٥‘ ٢٢٤۔
مؤقف فریق ثانی و دلائل و جوابات :
حجاج کے لیے عرفہ کے روز عرفات میں روزہ مکروہ ہے تاکہ وقوف میں خلل نہ آئے البتہ دیگر مقامات میں روزہ افضل ہے۔
سابقہ مؤقف کا جواب :
روایت میں ممانعت کا تعلق میدان عرفات میں موجود حجاج سے متعلق ہے دوسرے مقامات پر وہ وجہ نہیں پائی جاتی تو حکم نہ لگے گا دوسرے مقام کے لیے وہ عید نہیں اور ابوہریرہ (رض) کی روایت میں اس کی وضاحت موجود ہے۔
روایت ابوہریرہ (رض) ملاحظہ ہو۔