٣٢٤: عبید بن رفاعہ انصاری کہتے ہیں کہ ہم حضرت زید بن ثابت (رض) کے پاس بیٹھے تھے ہم نے انزال سے غسل کے سلسلہ میں باہمی مذاکرہ کیا تو زید بن ثابت (رض) کہنے لگے جب تم میں سے کوئی جماع کرے اور اسے انزال نہ ہو تو وہ اپنی شرمگاہ کو دھو لے اور نماز کے لیے جس طرح وضو کیا جاتا ہے اسی طرح وضو کرے۔
اہل مجلس کا ایک شخص اٹھ کر حضرت عمر (رض) کے پاس آیا اور ان کو اس کی اطلاع دی حضرت عمر (رض) نے اسی آدمی کو کہا تم بذات خود جاؤ اور ان کو میرے پاس لے آؤ تاکہ بذات خود تو ان پر گواہ بن جائے وہ جا کر زید بن ثابت (رض) کو لے آیا اس وقت عمر (رض) کے پاس اصحاب رسول اللہ (صلی اللہ علیہ وآلہ وسلم) میں حضرت علی بن ابی طالب اور معاذ بن جبل (رض) بیٹھے تھے۔
حضرت عمر (رض) کہنے لگے تو اپنی جان کا دشمن ہے تو لوگوں کو یہ فتویٰ دیتا ہے ؟ زید (رض) کہنے لگے اللہ کی قسم میں نے اس کو خود نہیں گھڑا بلکہ اپنے دونوں چچا رفاعہبن رافع اور ابو ایوب انصاری (رض) سے سنا ہے۔
حضرت عمر (رض) نے اپنے قریب اصحاب رسول اللہ (صلی اللہ علیہ وآلہ وسلم) سے استفسار فرمایا کہ تم کیا کہتے ہو انھوں نے اس سلسلہ میں اختلاف کیا۔
تو حضرت عمر (رض) نے فرمایا۔ اے اللہ کے بندو ! تم ہی اہل بدر ہو میں تمہارے علاوہ اور کس سے سوال کروں ؟ تو اس پر حضرت علی بن ابی طالب (رض) نے رائے کہ امہات المؤمنین ازواج النبی (صلی اللہ علیہ وآلہ وسلم) سے دریافت کریں اگر ان کے پاس اس سلسلہ میں کوئی چیز ہوگی تو آپ پر ظاہر ہوجائے گی حضرت عمر (رض) نے حضرت حفصہ (رض) کی طرف پیغام بھیجا انھوں نے اس سے لاعلمی کا اظہار کیا پھر حضرت عائشہ (رض) کے ہاں پیغام بھیجا تو انھوں نے کہا اذا جاوزالختان الختان فقد وجب الغسل کہ ختان کے مل جانے سے غسل واجب ہوجاتا ہے اس وقت حضرت عمر (رض) نے فرمایا اب میں جس کسی کے متعلق سنو گا کہ اس نے ایسا کیا مگر غسل نہیں کیا تو اس کو سخت سزا دے کر دوسروں کے لیے عبرت کا نمونہ بنا دوں گا۔
تخریج : مصنف ابن ابی شیبہ کتاب الطھارۃ ١؍٨٧‘