٣٢٦: عبید بن رفاعہ اپنے والد رفاعہ سے نقل کرتے ہیں کہ میں حضرت عمر بن خطاب (رض) کے ہاں بیٹھا تھا اچانک ان کے ہاں ایک آدمی وارد ہوا اور کہنے لگا اے امیرالمؤمنین ! یہ زید بن ثابت غسل جنابت کے متعلق اپنی رائے سے فتویٰ دیتے ہیں۔ حضرت عمر (رض) نے کہا ان کو جلد میرے پاس لاؤ وہ ان کو جلد لے آیا تو عمر (رض) نے کہا مجھے اطلاع ملی ہے کہ تم لوگوں کو غسل جنابت کے متعلق اپنی رائے سے مسجد نبوی (صلی اللہ علیہ وآلہ وسلم) میں فتویٰ دیتے ہو زید (رض) کہنے لگے سنو ! اللہ کی قسم اے امیرالمؤمنین میں اپنی رائے سے فتویٰ نہیں دیا بلکہ میں نے اپنے چچاؤں سے جو کچھ سنا وہی کہا عمر (رض) نے دریافت کیا تم نے اپنے کون سے چچاؤں سے سنا زید (رض) نے کہا میں نے ابی بن کعب ‘ ابو ایوب انصاری رفاعہ بن رافع (رض) سے سنا ہے۔
عمر (رض) ۔ میری طرف متوجہ ہو کر یہ نوجوان کیا کہتا ہے ؟
رفاعہ (رض) ۔ میں نے کہا ہم زمانہ نبوت میں ایسے کرتے تھے پھر غسل نہ کرتے تھے۔
عمر (رض) ۔ کیا تم نے اس سلسلے میں جناب نبی اکرم (صلی اللہ علیہ وآلہ وسلم) سے دریافت کیا۔
رفاعہ (رض) ۔ میں نے کہا نہیں۔
عمر (رض) ۔ اور لوگوں کو لاؤ پس اور لوگوں نے بالاتفاق کہا الماء لایکون الامن الماء یعنی صرف خروج منی سے غسل ہے۔
معاذ اور علی (رض) نے کہا : اذا جاوز الختان الختان فقد وجب الغسل کہ تجاوز ختان سے غسل لازم ہے۔ وہ کہنے لگے اے امیرالمؤمنین ! ازواج مطہرات کو جناب رسول اللہ (صلی اللہ علیہ وآلہ وسلم) کے عمل کا اس سلسلہ میں سب سے زیادہ علم ہے انھوں نے حضرت حفصہ (رض) سے پوچھا حفصہ (رض) نے کہا مجھے اس بات کا علم نہیں ہے۔ پھر حضرت عائشہ (رض) کی طرف پیغام بھیجا۔
حضرت عائشہ (رض) نے فرمایا اذا جاوزالختان الختان فقد وجب الغسل
کہ تجاوز ختان سے غسل واجب ہوجاتا ہے۔
اس سے عمر (رض) جوش میں آگئے اور فرمایا اگر مجھے کسی کے متعلق اطلاع ملی کہ وہ جماع بلاانزال کرتا ہے اور پھر غسل نہیں کرتا تو میں اسے سزا دینے میں کسر نہ اٹھا رکھوں گا۔
تخریج : مسند احمد ٥؍١١٥
اللغات : تحطم یہ الحطمہ سے ہے جس کا معنی آگ ہے یعنی غضبناک ہونا انھکتہ۔ نھک نھکًا۔ سخت سزا دینا۔
(س)