٣٣٧٠: عاصم نے انس (رض) سے نقل کیا کہ ابو طیبہ نے آپ کی سینگی لگائی جبکہ آپ روزے سے تھے پھر آپ نے اس کو اس کی سینگی لگانے کی اجرت عنایت فرمائی اگر اجرت حرام ہوتی تو آپ اس کو عنایت نہ فرماتے۔ آپ کا یہ فعل اس پر دلالت کرتا ہے کہ سینگی سے روزہ نہیں ٹوٹتا اگر اس سے روزہ ٹوٹتا تو آپ سینگی نہ لگواتے جب کہ آپ تو روزے سے تھے ۔ آثار و روایات کی درستی کے لحاظ سے اس باب کی یہی صورت ہے۔ باقی نظر وفکر کے لحاظ سے ہم یہ بات پاتے ہیں کہ خون نکلنے کی سخت ترین صورت یہ ہے کہ اس سے وضو ٹوٹ جاتا ہے اسی طرح بول وبراز کے نکلنے سے بھی وضو ٹوٹ جاتا ہے مگر روزہ نہیں ٹوٹتا پس غور و فکر اسی بات کو چاہتا ہے کہ خون کا بھی یہی حکم ہو اور ہم یہ بھی پاتے ہیں اگر رگ میں سے خون نکالا جاتے تو اس سے روزہ نہیں ٹوٹتا تو قیاس یہی چاہتا ہے کہ سینگی سے روزہ نہ ٹوٹے امام ابوحنیفہ ‘ ابو یوسف ‘ محمد رحمہم اللہ کا قول یہی ہے۔
تخریج : بخاری فی البیوع باب ٣٩‘ ٩٥‘ والاجارہ باب ١٧‘ والطب باب ١٣‘ مسلم فی المساقاۃ ٦٢‘ ابو داؤد فی البیوع باب ٣٨‘ ترمذی فی البیوع باب ٤٨‘ دارمی فی البیوع باب ٧٩‘ مالک فی الستیذان ٢٦‘ مسند احمد ٣؍١٠٠‘ ١٧٤‘ ١٨٢۔
البتہ روزے کا تذکرہ صحاح میں موجود نہیں ہے جبکہ روایت ابن عباس (رض) میں موجود ہے نمبر ٣٣٦١۔
آپ (صلی اللہ علیہ وآلہ وسلم) کا حجامت کرانا یہ دلالت کررہا ہے کہ اس سے روزہ نہیں ٹوٹتا۔ اگر اس سے روزہ ٹوٹتا ہوتا تو آپ سینگی نہ لگواتے جبکہ آپ روزہ کی حالت میں تھے نمبر ٣٣٦٠ میں صراحت سے موجود ہے۔
تصحیح آثار کے طور پر تو یہ صورت ذکر کردی اب طریق نظر سے ملاحظہ کرلیں۔
نظر طحاوی بقلم طحاوی (رح) :
خروج دم کی سب سے سخت حالت یہ ہے کہ اس سے وضو ٹوٹ جائے اور طہارت ختم ہوجائے اور پیشاب و پاخانہ کے خروج سے بھی طہارۃ ٹوٹ جاتی ہے مگر ان سے روزہ نہیں ٹوٹتا نظر کا تقاضا یہ ہے کہ خون بھی اسی طرح ہو اور ہم نے نگاہ دوڑائی تو دیکھا کہ رگ کسے فصد سے روزہ نہیں ٹوٹتا پس پچھنے اور سینگی بھی ظاہر میں اسی طرح ہے بلکہ اس سے کم تر ہے۔
امام ابوحنیفہ ‘ ابو یوسف ‘ محمد رحمہم اللہ تعالیٰ کا بھی یہی قول ہے۔