٣٤٣٥: ابن شہاب نے عمرہ سے انھوں نے عائشہ (رض) سے نقل کیا کہ ابو سعید خدری (رض) فتویٰ دیتے تھے کہ جناب رسول اللہ (صلی اللہ علیہ وآلہ وسلم) نے فرمایا عورت کے لیے اس وقت تک سفر درست نہیں جب تک کہ اس کے ساتھ محرم نہ ہو تو اس پر عائشہ (رض) نے فرمایا ہر عورت کا تو محرم نہیں ہوتا۔ ان مستدلین کے خلاف دلیل وہ کثیر روایات ہیں جن کو ہم نے جناب رسول اللہ (صلی اللہ علیہ وآلہ وسلم) سے نقل کیا ہے۔ اگر کوئی معترض یہ کہے کہ حج کا سفر اس سفر میں شامل ہی نہیں جس کی بلا محرم ممانعت کی گئی ہے تو ان کے جواب میں ہم یہ کہیں گے کہ حضرت ابن عباس (رض) کی وہ روایت جو اس باب کی ابتداء میں مذکور ہوچکی ہے وہ تمہارے جواب کے لیے کافی ہے کہ اس میں مذکور ہے ‘ کہ جناب رسول اللہ (صلی اللہ علیہ وآلہ وسلم) نے خطبہ ارشاد فرمایا اور فرمایا عورت اپنے محرم ہی کے ساتھ سفر کرے۔ ایک شخص نے آپ سے سوال کیا کہ حضرت میں اپنی بیوی سمیت حج کرنا چاہتا ہوں اور فلاں غزوہ میں میرا نام درج کیا گیا ہے۔ تو آپ نے ارشاد فرمایا اپنی بیوی کے ساتھ حج کرو۔ اس سے یہ دلالت مل گئی کہ عورت کو اپنے محرم کے بغیر حج درست نہ تھا اگر یہ بات نہ ہوتی تو جناب رسول اللہ (صلی اللہ علیہ وآلہ وسلم) اس کو فرما دیتے کہ اسے تو تیری ضرورت نہیں ہے کیونکہ وہ دوسرے مسلمانوں کے ساتھ حج کرے گی تو اپنے مقررہ غزوہ کی طرف چلے جا۔ آپ کے غزوہ ترک کرانے اور اپنی بیوی کے ساتھ حج کا حکم دینے میں دلیل یہ ہے کہ اس کو حج اپنی بیوی کے ساتھ ضروری ہے۔ (ممکن ہے پھر محرم میسر نہ ہو) ایک معترض کا کہنا یہ ہے کہ حضرت ابن عمر (رض) سے روایت ہے کہ جناب نبی اکرم (صلی اللہ علیہ وآلہ وسلم) نے ارشاد فرمایا کوئی عورت تین دن کی مسافت پر محرم کے علاوہ سفر نہ کرے ۔ مگر ان کا اپنا فتویٰ اس کے مخالف ہے ملاحظہ ذیل ہو۔
u: حضرت عائشہ (رض) کا قول جب متواتر روایات مرفوعہ کے خلاف ہے تو اس کو ترک کردیا جائے گا اور ان روایات کو لیا جائے گا نیز موقعہ قیاس کا نہیں پس نقل کو ترجیح حاصل ہوگی۔
سرسری اشکال :
ان روایات میں جس سفر کی ممانعت کی گئی ہے وہ عام سفر ہیں حج ان میں داخل نہیں وہ اس سے مستثنیٰ ہے۔
u: سفر حج کا اس سے مستثنیٰ کہنا درست نہیں ہم باب کی ابتداء میں روایات ابن عباس (رض) نقل کر آئے کہ جب رسول اللہ (صلی اللہ علیہ وآلہ وسلم) نے خطبہ میں ارشاد فرمایا کہ کوئی عورت بغیر محرم کے سفر نہ کرے تو ایک آدمی نے کھڑے ہو کر سوال کیا کہ میں اپنی بیوی کے ساتھ حج کر ارادہ رکھتا ہوں اور فلاں غزوہ میں ‘ میں نے اپنے آقا سے مکاتبت کرلی ہے تو کیا بدل کتابت کو جمع کرنا زیادہ ضروری ہے یا میں حج پر چلا جاؤں آپ نے فرمایا تم حج پر جاؤ۔
اس سے یہ بات ثابت ہوگئی کہ عورت کو بلامحرم حج درست نہیں اگر ایسا نہ ہوتا تو جناب رسول اللہ (صلی اللہ علیہ وآلہ وسلم) اس کو فرماتے کہ تمہاری ضرورت نہیں وہ مسلمانوں کے قافلہ کے ساتھ حج کرے آپ کا اسے اپنی بیوی کے ساتھ حج کا حکم دینا یہ اس بات کی کھلی دلیل ہے کہ اس کا حج محرم کے بغیر نہ ہوگا۔
دوسرا اشکال :
تم نے ابن عمر (رض) کی زبانی جناب رسول اللہ (صلی اللہ علیہ وآلہ وسلم) کا یہ ارشاد نقل کیا عورت تین دن رات کا سفر بغیر محرم کے نہ کرے۔ حالانکہ ابن عمر (رض) کا فتویٰ اس کے خلاف منقول ہے۔ وہ ملاحظہ کرلیں۔
نافع بیان کرتے ہیں کہ ابن عمر (رض) اپنی آزاد کردہ لونڈیوں کے ساتھ سفر کرتے تھے جبکہ ان کے ساتھ ان کا کوئی محرم نہ ہوتا تھا حالانکہ آزاد کردہ لونڈی تو غیر محرم کے حکم میں ہے۔ اس کے جواب میں ہم یہ عرض کریں گے کہ یہ روایت اس کے مخالفت جو ہم نے ابن عمر (رض) کی وساطت سے جناب رسول اللہ (صلی اللہ علیہ وآلہ وسلم) سے نقل کی ہے۔ کیونکہ آپ (صلی اللہ علیہ وآلہ وسلم) سے ہم نے مطلق ممانعت نقل نہیں ہے کہ عورت کوئی ساسفر بھی بلا محرم نہ کرے بلکہ ہم نے حضرت ابن عمر (رض) کی وساطت سے جناب رسول اللہ (صلی اللہ علیہ وآلہ وسلم) سے یہ روایت کی ہے کہ آپ نے عورت کو محرم کے علاوہ تین دن کا سفر کرنے سے منع فرمایا ہے ‘ تو اس میں محرم کے بغیر تین دن کی مسافت پر سفر کرنے کی ممانعت ہے اور اس سے کم مسافت کا سفر درست ہے۔ تو عین ممکن ہے کہ ان کے ساتھ محرم کے بغیر لونڈیوں کا سفر وہ سفر ہو جو جناب نبی اکرم (صلی اللہ علیہ وآلہ وسلم) سے روایت کردہ ممانعت میں داخل نہیں۔ دوسرے علماء نے بلا محرم سفر کے مباح پر حضرت عائشہ صدیقہ (رض) کی یہ روایت پیش کی ہے کہ وہ بلا محرم سفر کرتی تھیں روایت ذیل میں ہے۔

نوٹ : یہ روایت اس کے خلاف نہیں چونکہ جناب نبی اکرم (صلی اللہ علیہ وآلہ وسلم) سے جو روایت نقل کی گئی ہے اس میں یہ مذکور نہیں کہ ہر تھوڑے زیادہ سفر کے لیے محرم لازم ہے بلکہ ابن عمر (رض) والی روایت میں تین دن رات کی ممانعت ہے اور اس سے کم سفر کے مباح ہونے میں کلام نہیں پس سفر جس کا تذکرہ آپ کی پیش کردہ روایت میں ہے وہ مباح سفر سے ہے پس دونوں میں تضاد نہیں۔