٣٤٥١: میمون بن مہران نے ابن عمر (رض) سے روایت کی ہے کہ جناب نبی اکرم (صلی اللہ علیہ وآلہ وسلم) نے اہل مدینہ کے لیے ذوالحلیفہ ‘ اہل شام کے لیے جحفہ اور اہل یمن کے لیے یلملم اور اہل طائف کے لیے قرن کو میقات مقرر فرمایا۔ ابن عمر کہتے ہیں کہ لوگ کہتے ہیں کہ اہل مشرق کے لیے ذات عرق ہے۔ یہ ابن عمر (رض) کہہ رہے ہیں کہ لوگ کہتے ہیں اور ابن عمر (رض) کی مراد لوگوں سے یہاں اہل علم وتقویٰ ہیں اور یہ بات ممکن نہیں کہ انھوں نے یہ اپنی رائے سے کہی ہے۔ کیونکہ یہ اجتہادی چیزوں سے نہیں ‘ بلکہ انھوں نے وہی بات کہی جس کی اطلاع جناب رسول اللہ (صلی اللہ علیہ وآلہ وسلم) نے ان کو دی۔ اگر کوئی معترض یہ کہے کہ یہ کیسے ممکن ہے کہ آپ نے اہل عراق کے لیے میقات مقرر کیا جب کہ عراق اس وقت تک اہل اسلام کے پاس نہ تھا۔ اس جواب یہ ہے کہ اہل شام کے لیے میقات مقرر فرمایا حالانکہ شام دور صدیقی میں فتح ہوا ۔ اصل مقصد اہل شام کے میقات کا یہ تھا کہ جو اس جانب بسنے والے لوگ ہیں۔ اسی طرح عراق کے میقات سے جانب عراق مراد ہے۔ مثلاً طی کے پہاڑ اور ان کے اطراف اور اگر اہل شام کے لیے میقات کی تقریری وحی الٰہی سے ہوئی تو وحی سے یہ علم ہوا کہ عنقریب شام دارالاسلام ہوگا ۔ پس اہل عراق کے میقات کا بھی یہی حال ہے کہ آپ کو وحی سے معلوم ہوا کہ عراق عنقریب اہل عراق اپنی زکوۃ میں وہ کچھ کریں گے جو اہل شام اپنی زکوۃ کے سلسلہ میں کریں گے ۔ ذیل کی روایت ملاحظہ ہو۔
حاصل روایت : یہ ابن عمر (رض) خود بتلا رہے ہیں کہ لوگ کہتے ہیں کہ اہل مشرق کے لیے ذات عرق ہے۔ الناس سے یہاں عام لوگ ہرگز مراد نہیں یہ توقیفی چیز ہے اور اہل علم ہی اس سے مراد ہیں تو وہ اپنی طرف سے نہیں کہہ سکتے کیونکہ یہ آپ (صلی اللہ علیہ وآلہ وسلم) کے بتلانے پر موقوف ہے۔
ایک اعتراض :
یہ کس طرح ہوسکتا ہے کہ جناب نبی اکرم (صلی اللہ علیہ وآلہ وسلم) نے اہل عراق کے لیے میقات مقرر کردیا حالانکہ اس وقت اہل عراق مسلمان ہی نہ تھے۔
جواب : اس وقت اہل شام بھی مسلمان نہ تھے جیسا ان کے لیے میقات مقرر کیا اسی طرح اہل عراق کے لیے میقات مقرر فرمایا ممالک کی وہ اطراف اہل جزیرۃ العرب کے لیے تو موجود تھیں تمام لوگ جزیرہ عرب کے میقات کے اندر تو نہیں رہتے تھے۔ اہل شام سے مراد شام والی جانب مراد ہے اور اہل عراق والی جانب کا کچھ علاقہ آپ کے زمانے میں فتح ہوا تھا مثلاً جبل طیی اور ان کے اطراف ‘ اہل شام کے لیے میقات اس لیے اگر مقرر فرمایا کہ وہ عنقریب مسلمان ہوں گے تو اہل عراق کے لیے بھی ان کے مسلمان ہونے کی خوشخبری وحی سے مل چکی تھی اسی طرح زکوۃ کے سلسلہ میں بھی انھوں نے اسی طرح کرنا تھا جس طرح کہ اہل شام نے کرنا تھا۔ ان روایات کو ملاحظہ کریں۔