٣٥٥٢: نافع نے ابن عمر (رض) سے انھوں نے جناب نبی اکرم (صلی اللہ علیہ وآلہ وسلم) سے اسی طرح روایت نقل کی ہے۔ امام طحاوی (رح) فرماتے ہیں کہ بعض علماء نے اس آثار کو اختیار کرتے ہوئے فرمایا کہ جس کپڑے میں ورس و زعفران لگی ہو اس کا استعمال احرام میں درست نہیں ہے۔ خواہ اسے دھو ڈالا جائے کیونکہ جناب رسول اللہ (صلی اللہ علیہ وآلہ وسلم) نے ان آثار میں دھوئے جانے والا کپڑے کو نہ دھوئے جانے والے سے الگ ذکر نہیں فرمایا پس ممانعت دونوں ہی قسموں سے متعلق ہوگئی۔ مگر دیگر علماء نے ان سے اختلاف کرتے ہوئے فرمایا جس کپڑے کو دھولیں اور اس سے مہک ختم ہوجائے اسے حالت احرام میں استعمال کرنا چنداں حرج نہیں رکھتا اور ورس و زعفران سے رنگے ہوئے کپڑے کی ممانعت کا سبب یہ کہ وہ ایسا کپڑا پہن کر احرام میں داخل ہو رہا ہے۔ جس کا استعمال محرم پر حرام ہے۔ جب وہ دھوڈالا گیا تو وہ اس حکم سے نکل گیا اور وجہ ممانعت جاتی رہی اور کپڑا اپنی اصل حالت میں لوٹ آیا جو کہ اس سے پہنچنے سے پہلے کی حالت تھی ۔ اس کپڑے کا حال اس پاک کپڑے جیسا ہے کہ جس کو نجاست لگ گئی تو اس کے ساتھ نماز جائز نہ رہی جب نجاست سے پاک کردیا گیا اور نجاست کو زائل کردیا تو وہ پاک ہوگیا۔ اس کے ساتھ نماز جائز ہوگی ۔ اس سلسلہ میں جناب رسول اللہ (صلی اللہ علیہ وآلہ وسلم) سے وارد ہے کہ آپ نے محرم پر حرام ہونے والی صورت سے اس کو مستثنیٰ کر کے بیان فرمایا اور فرمایا مگر اس صورت میں کہ اسے دھوڈالا جائے۔
حاصل روایات : ان تمام روایات سے یہ بات ثابت ہوتی ہے کہ ہر وہ کپڑا جس کو زعفران یا ورس نے چھوا ہو خواہ اسے دھو لیا جائے یا نہ دھویا جائے ہر صورۃ میں اس کا استعمال ناجائز ہے کیونکہ جناب رسول اللہ (صلی اللہ علیہ وآلہ وسلم) نے کپڑے کے مغسول و غیر مغسول ہونے میں کوئی فرق نہیں فرمایا۔
فریق ثانی کا مؤقف :
ورس و زعفران جس کپڑے کو لگ جائے اور اس کو دھو ڈالا جائے یہاں تک کہ وہ نہ جھڑے تو محرم کو اسے احرام میں استعمال کرنا درست ہے کیونکہ دھو ڈالنے کی وجہ سے وہ ممانعت والی وجہ ختم ہوگئی اور کپڑا اپنی اس حالت پر آگیا جو زعفران سے پہلے تھی اور اس کی مثال اس پاک کپڑے جیسی ہے جس کو نجاست پہنچنے سے وہ نجس ہوگیا اس میں نماز ناجائز ہوگئی پھر جب اسے دھو لیا گیا اور نجاست کا اثر اس سے جاتا رہا تو وہ کپڑا پاک ہوگیا اور اس میں نماز بھی درست و جائز ہوگئی اور جناب رسول اللہ (صلی اللہ علیہ وآلہ وسلم) کی طرف سے اس کے استثناء کا ثبوت بھی ملتا ہے۔ ” الا ان یکون غسیلًا “