٣٥٨٤: عروہ بن زبیر نے بیان کیا کہ عائشہ (رض) نے جناب رسول اللہ (صلی اللہ علیہ وآلہ وسلم) کے حج تمتع کی خبر دی اور لوگوں نے بھی آپ کے ساتھ تمتع کیا جیسا کہ مجھے سالم نے عبداللہ عن رسول اللہ (صلی اللہ علیہ وآلہ وسلم) خبر دی۔ اگر کوئی معترض یہ کہے کہ ہم نے اس باب کی ابتداء میں حضرت عائشہ صدیقہ (رض) سے اس کے خلاف روایت نقل کی ہے کہ جناب رسول اللہ (صلی اللہ علیہ وآلہ وسلم) نے حج افراد فرمایا ہے اور دوسری روایت عائشہ صدیقہ (رض) سے اس طرح نقل کی کہ ہم جناب رسول اللہ (صلی اللہ علیہ وآلہ وسلم) کے ساتھ حجۃ الوداع والے سال نکلے ہم میں سے بعض نے عمرے اور بعض نے حج وغیرہ اور بعض نے فقط حج کا احرام باندھا ہوا تھا۔ اور جناب رسول اللہ (صلی اللہ علیہ وآلہ وسلم) نے بھی فقط حج کا احرام باندھا۔ “ اسی طرح تیسری روایت عائشہ صدیقہ (رض) سے اس طرح روایت کی ہے کہ جناب رسول اللہ (صلی اللہ علیہ وآلہ وسلم) نے حجۃ الوداع والے سال حج افراد کا احرام باندھا اور عمرہ نہیں کیا۔ “ اس کو جواب میں یہ کہا جائے گا وہ افراد جس کا تذکرہ ان روایات مذکورہ بالا میں ہے۔ ممکن ہے کہ وہ افراد اس طرح کا ہو جو زہری (رح) کی اس روایت کے مفہوم کے مخالف نہ ہو۔ جو انھوں نے حضرت عائشہ صدیقہ (رض) سے نقل کی ہے اور عین ممکن ہے کہ وہ اس طرح ہو کہ جس افراد کو قاسم نے پہلی روایت میں حضرت عائشہ صدیقہ (رض) سے ذکر کیا ہے اس سے ان کی مراد یہ ہے کہ جب آپ نے احرام باندھا تو حج افراد کا باندھا اگرچہ اس سے فراغت کے بعد عمرہ کا احرام باندھا ہو بلکہ ان کی مراد یہ کہ حج کے احرام کے ساتھ عمرے کے احرام کو نہیں ملایا جیسا کہ آپ کے کئی صحابہ کرام (رض) نے کہا۔ رہی دوسری روایت عائشہ صدیقہ (رض) اس میں انھوں نے یہ خبر دی ہے ‘ کہ ان میں سے بعض نے فقط عمرے کا احرام باندھا اور بعض نے فقط حج کا احرام باندھا ۔ اس روایت میں تمتع کا تذکرہ نہیں ہے تو عین ممکن ہے۔ کہ جنہوں نے پہلے عمرے کا احرام باندھا انھوں نے اس کے بعد حج کا احرام بھی باندھا ہو ‘ ان کی اس روایت میں اس بات کی کچھ بھی نفی نہیں ہے اور حضرت صدیقہ (رض) تو یہ فرما رہی ہیں واھل رسول اللہ (صلی اللہ علیہ وآلہ وسلم) بالحج مفرداً ‘ ‘ تو یہ کہنا ممکن ہے کہ اس سے مراد وہ حج مفرد ہو ۔ اس عمرہ کے بعد جو آپ نے پہلے فقط عمرے ہی کا احرام باندھا جیسا کہ قاسم ومحمد بن عبد الرحمن کی روایات میں ہے کہ پھر آپ نے اس کے بعد حج کا احرام باندھا۔ جیسا کہ زہری والی روایت میں عروہ سے منقول ہے۔ ( یہ اس لیے کہا) تاکہ آثار متفق ہوجائیں اور ان میں تضاد نہ رہے۔ رہی ام علقمہ نے جو حضرت صدیقہ (رض) سے روایت کی ہے کہ : (ان رسول اللہ (صلی اللہ علیہ وآلہ وسلم) افرد الحج ولم یعتمر) تو عین ممکن ہے کہ اس سے حضرت صدیقہ (رض) کی مراد یہ ہو کہ آپ نے حج کا احرام باندھتے وقت عمرہ نہیں کیا جیسا کہ آپ کے ساتھ بعض صحابہ کرام (رض) نے کیا ۔ بلکہ اس کے بعد عمرہ کیا۔
حاصل روایات : ان تمام روایات سے ثابت ہوتا ہے کہ جناب رسول اللہ (صلی اللہ علیہ وآلہ وسلم) کا حج حج تمتع تھا۔
ایک اشکال :
شروع باب میں تم نے عائشہ (رض) کی روایت جس کو قاسم نے نقل کیا اس میں واضح طور پر موجود ہے کہ جناب رسول اللہ (صلی اللہ علیہ وآلہ وسلم) نے حج افراد کیا۔
نمبر 2: اسی طرح عروہ عن عائشہ (رض) کی روایت۔
نمبر 3: ام علقمہ عن عائشہ (رض) کی روایات ان تمام رویا ات میں تو حج افراد کا واضح تذکرہ ہے۔ اور عمرہ نہ کرنے کا صاف ذکر ہے۔
حاصل کلام :
نمبر 1: حضرت عائشہ (رض) کے ارشاد کا مطلب یہ ہے کہ آپ نے حج کے احرام کے ساتھ ملا کر عمرے کا احرام نہیں باندھا حج کا پہلے احرام باندھا پھر عمرے کا احرام باندھا دوسروں کی طرح نہیں کیا کہ جنہوں نے دونوں کا احرام ملا کر باندھا تھا فقط حج کے احرام کو افرد الحج سے تعبیر کیا۔ ارکان عمرہ کی ادائیگی کے بعد حج کا احرام باندھنا یا حج کا احرام باندھ کر پھر عمرہ کا احرام باندھنا یہ تمتع کے منافی نہیں ہے۔
نمبر 2: روایت عروہ میں حضرت عائشۃ (رض) سے یہ بتلایا کہ بعض نے فقط عمرے کا احرام باندھ رکھا تھا حج کا احرام ساتھ نہ تھا اور بعض نے حج وعمرہ دونوں کا احرام باندھ رکھا تھا یعنی دونوں کا اکٹھا احرام باندھا اور بعض نے فقط حج کا احرام تمتع کے تذکرہ کے بغیر باندھا اس کا یہ مطلب ہوسکتا ہے کہ جنہوں نے عمرہ کا احرام باندھا انھوں نے اس کے بعد حج کا احرام فراغت عمرہ کے بعد باندھ لیا تو یہ روایت حج تمتع کی بالکل نفی نہیں کرتی۔
نمبر 3: عائشہ صدیقہ (رض) کی یہ روایت اہل رسول اللہ ا بالحج مفردًا۔ اس کا مفہوم یہ ہے کہ عمرہ الگ سے مکمل کرنے کے بعد اس حج کا احرام باندھا اس لیے اس کو مفرد د سے تعبیر کیا ‘ مفرد عمرے کا تذکرہ روایت قاسم اور محمد عن عروہ میں موجود ہے پھر حج کا احرام مفرد باندھا جیسا کہ روایت زہری میں وارد ہے۔ اس سے ان روایات کے مابین اختلاف نہ رہا۔
نمبر 4: روایت ام علقمہ : ان رسول اللہ افرد بالحج ولم یعتمر “ اس کا معنی یہ ہے کہ حج کے احرام کے وقت آپ نے عمرہ نہیں کیا جیسا کہ آپ کے بعض اصحاب نے کیا بلکہ پہلے عمرہ الگ احرام سے آپ کرچکے تھے تو حج کے ساتھ عمرہ نہیں کیا۔ یا مطلب یہ ہے۔ حج کے احرام سے آپ نے عمرہ نہیں کیا بلکہ حج کے بعد عمرہ کیا جیسا کہ اس روایت میں ہے۔