٣٦١٤: صدقہ بن یسار نے ابن عمر (رض) سے روایت کی ہے کہ اللہ کی قسم حج سے پہلے میں عمرہ کروں اور ہدی روانہ کروں یہ مجھے ذوالحجہ میں حج کے بعد عمرے سے زیادہ محبوب و پسندیدہ ہے۔ تو یہ ابن عمر (رض) ہیں جو حج کے مہینوں میں عمرے کو دوسرے مہینوں سے افضل قرار دے رہے ہیں۔ پس یہ اس بات کے درست ہونے کی دلالت ہے جو حضرت ابن عباس (رض) نے حضرت عمر (رض) سے روایت کی ہے۔ کیونکہ اگر حضرت ابن عمر (رض) حضرت عمر (رض) سے وہ بات سنتے جو عقیل والی روایت میں بواسطہ زہری نقل کی گئی ہے۔ تو وہ قطعا اس کے خلاف نہ فرماتے کیونکہ انھوں نے اپنے والد سے سنا ہوتا جو بات آپ نے صحابہ کرام کی موجودگی میں ارشاد فرمائی اور کسی نے بھی اس کا انکار نہیں کیا اور نہ رد کیا اور وہ اس کی تردید کرتے ہوئے یہ نہ فرماتے کہ جناب رسول اللہ (صلی اللہ علیہ وآلہ وسلم) نے اس طرح کیا ۔ بلکہ حضرت عمر (رض) سے جو کچھ بیان کیا گیا وہ اسی وجطہ سے تھا کہ آپ کا یہ ارادہ تھا کہ بیت اللہ شریف کی بار بار زیارت کی جائے اور باقی کلام تو حضرت سالم کا کلام ہے جس کو زہری نے اپنی روایت میں مخلوط کر کے ذکر کردیا اور دونوں کے مابین اس نے امتیاز نہیں کیا۔ رہا ان کا قول ان العمرۃ فی اشھر الحج لا تتم الا بالھدی الحدیث کہ عمرہ تو حج کے زمانہ میں ھدی کے ساتھ یا اس کے بدل روزے سے مکمل ہوتا ہے کہ ہدی کی طاقت نہ رکھتا ہو ۔ پس اس سے یہ ثابت ہوگیا کہ ایام حج کے علاوہ میں عمرہ مکمل ہوجاتا ہے جب کہ وہ (ہدی) اس میں واجب نہ ہو اور اس عمرہ میں نقص رہ جاتا ہے جو اشہر حج میں ہو اور اس میں اس نے ہدی کو اپنے اوپر واجب کیا ہو ۔ یہ تمام صورتیں تب ہیں جب کہ حج عمرے کے بعد ہو۔ جو لوگ اس قول کے قائل ہیں ہمارے ہاں ان کے خلاف دلیل یہ ہے ( واللہ اعلم) ہم یہ بات بخوبی جانتے ہیں کہ تمتع اور قرا ن کی واجب ہدی کا گوشت بالا تفاق کھایا جاتا ہے متقدمین اس پر متفق ہیں۔ دوسری طرف ہم یہ دیکھتے ہیں کہ وہ ہدی جو حج یا عمرہ میں کسی کوتاہی کی بناء پر لازم آتی ہے اسے بالا تفاق محرم نہیں کھا سکتا ۔ پس جب یہ ھدی متعہ وقرآن والی کھائی جاتی ہے تو معلوم ہوا یہ حج وعمرہ کے کسی نقصان کی وجہ سے ھدی نہیں دی جا رہی اگر یہ نقصان کی وجہ سے ہوتی تو یہ ان واجب خونوں کی طرح ہوتا اور اس کو متمتع کیلئے کھانا درست نہ ہوتا جیسا دوسرے ہدایا کو کھایا نہیں جاسکتا بلکہ یہ شکرانے کا دم ہے جو خیر کے میسر آنے کی وجہ سے ہے۔
حاصل روایات : کہ ابن عمر (رض) کے ہاں بھی اشہر حج میں عمرہ کرنا اشہر حج کے علاوہ مہینوں میں عمرہ کرنے سے افضل ہے۔ اس سے ابن عباس (رض) کے قول کی صحت پر بھی تصدیقی مہر ثبت ہوگئی۔
نوٹ :
کلام میں اختلاط ہے : اب یہ بات تو ثابت ہوگئی کہ ابن عمر (رض) کی طرف اس روایت میں جو بات منسوب کی گئی وہ ان کا اپنا کلام نہیں ورنہ وہ اس کے خلاف فتویٰ نہ دیتے اور انھوں نے عمر (رض) سے بھی نہیں سنا۔ تو یہ روایت ان تمام روایات کے خلاف ہے جو زہری کے علاوہ دوسروں نے نقل کی ہیں۔ وہ ابن عمر (رض) نے اصحاب رسول اللہ (صلی اللہ علیہ وآلہ وسلم) کی موجودگی میں کہیں ان پر کسی نے انکار نہیں کیا کہ یہ تو جناب رسول اللہ (صلی اللہ علیہ وآلہ وسلم) نے نہیں فرمائی اگر وہ بات جو حدیث زہری میں منقول ہے ابن عمر (رض) نے عمر (رض) سے سنی ہوتی تو اس کے خلاف نہ کہتے۔ اب حاصل کلام یہ ہوا کہ عمر (رض) کی بات تو اتنی تھی کہ بیت اللہ کی زیارت سال میں بار بار ہو بس۔ باقی کلام سالم کا ہے جس کو زہری نے اپنی روایت میں بلا امتیاز کلام عمر (رض) سے ملا دیا اس کی وجہ یہ ہے کہ حج وعمرہ یعنی (تمتع و قران) میں واجب ہونے والی قربانی دم شکر ہے دم جبر نقصان نہیں کیونکہ دونوں میں واضح فرق موجود ہے دم شکر کو قارن و متمتع خود کھا سکتا ہے دم جبر کو خود استعمال کرنے کی اجازت نہیں۔ اس روایت میں ابن شہاب نے ہدی کو تتمہ حج قرار دیا ہے اور حج والے عمرے کو نقصان والا عمرہ قرار دیا۔ حالانکہ یہ درست نہیں حضرت عمر (رض) کے بقیہ ارشادات اس کے خلاف ہیں۔