٣٦٢٧: حمید نے بکر مزنی سے روایت کی ہے وہ کہتے ہیں کہ میں نے ابن عمر (رض) کو انس (رض) کے قول کی اطلاع دی تو انھوں نے کہا کہ انس (رض) کو بھول لگی ہے۔ بکر نے واپس لوٹ کر انس (رض) کو بتلایا کہ ابن عمر (رض) تو یہ کہتے ہیں کہ انس بھول گئے تو انس کہنے لگے وہ بچے ہونے کی وجہ سے ہم پر تجاوز کرتے ہیں بلکہ میں نے تو جناب رسول اللہ (صلی اللہ علیہ وآلہ وسلم) کو خود فرماتے سنا ” لبیک بعمرۃ و حجۃ معا “۔
تخریج : مسلم فی الحج ١٨٥۔
حاصل روایات : ابن عمر (رض) نے انس (رض) کی اس بات کا انکار کیا کہ جناب رسول اللہ (صلی اللہ علیہ وآلہ وسلم) نے دونوں کا اکٹھا احرام باندھا۔ ابن عمر (رض) کے ہاں بات یہ تھی کہ پہلے آپ مفرد تھے پھر اس کو عمرہ بنا لیا اور اس کے ساتھ حج کو ملا لیا تو آپ اس وقت قارن بن گئے ابن عمر (رض) کے نزدیک شروع میں آپ حج افراد والے تھے۔ حضرت انس (رض) کی بہت سی روایات اس بات کو ثابت کرتی ہیں کہ آپ (صلی اللہ علیہ وآلہ وسلم) نے دونوں کا احرام باندھا ۔