٣٧١٩: سعید بن جبیر نے ابن عباس (رض) سے روایت کی ہے کہ حضرت صعب بن جثامہ (رض) نے جناب رسول اللہ (صلی اللہ علیہ وآلہ وسلم) کی خدمت میں حمار وحشی کی ران بھیجی جس سے خون ٹپک رہا تھا آپ نے واپس کردی ایک راوی نے عجز حمار اور دوسرے نے فخذ حمار کہا۔ حضرت ابن عباس (رض) سے حدیث صعب (رض) میں روایات اس پر متفق ہیں کہ آپ نے ھدیہ واپس فرمایا اور وہ ھدیہ اس شکار کا گوشت تھا نہ کہ زندہ حیوان۔ پس اس میں ان حضرات کی دلیل نکل رہی ہے جنہوں نے شکار کا گوشت محرم کے لیے مکروہ قرار دیا ہے خواہ اس شکار کا کرنے والا اور ذبح کرنے والا غیر محرم ہو اور جناب رسول اللہ (صلی اللہ علیہ وآلہ وسلم) سے اس کے خلاف روایات وارد ہیں روایات ملاحظہ ہوں۔ علماء کی ایک جماعت نے اس بات کو اختیار کر کے کہا کہ ہر وہ شکار جو محرم کی خاطر کیا جائے خواہ اس کا شکار کرنے والا غیر محرم ہو مگر وہ شکار محرم کے لیے حرام ہے جیسا کہ وہ شکار حرام ہے جس کو محرم خود شکار کرے۔ دیگر علماء نے ان سے اختلاف کرتے ہوئے کہا ہر وہ شکار جس کو غیر محرم نے شکار کیا ہو اس کا گوشت غیر محرم و محرم کے لیے حلال ہے۔ ان کی دلیل مطلب کی روایت میں جناب رسول اللہ (صلی اللہ علیہ وآلہ وسلم) کا یہ ارشاد ہے : ” اویصادلکم “ اس میں ایک احتمال یہ ہے ” او یصادلکم بامر لکم “ وہ تمہارے لیے تمہارے حکم سے شکار کیا جائے۔ پس اگر یہ اسی طرح ہے تو ان کے ہاں اس کا حکم یہی ہے کہ ہر وہ شکار جس کو غیر محرم شکار کرے مگر محرم کے حکم سے اس کی خاطر کرے تو وہ بھی محرم کے لیے حرام ہے۔ حالانکہ جناب رسول اللہ (صلی اللہ علیہ وآلہ وسلم) سے بہت سی احادیث آئی ہیں جو شکار کے گوشت کو محرم کیلئے حلال ثابت کرتی ہیں جس شکار کو غیر محرم نے شکار کیا ہو اور اس میں محرم کا حکم شامل نہ ہو اور اس کی اعانت سے شکار کیا گیا ہو۔
حاصل روایات : ان روایات کو ملاحظہ کرلیا۔ زید بن ارقم (رض) کی روایت مجمل ہے اس میں واضح نہیں کہ کیوں مسترد فرمایا۔ ممکن ہے رد کرنے کی وجہ دوسری ہو۔ پس وہ بھی فریق اوّل کی مستدل نہیں اور حضرت صعب بن جثامہ (رض) کی روایت سے بھی استدلال درست نہیں کیونکہ وہ مضطرب ہے۔ اضطراب ملاحظہ ہو۔
اس روایت کو نقل کرنے والے ابن عباس (رض) ہیں ان سے ان کے دو شاگرد عبیداللہ بن عبداللہ اور سعید بن جبیر نقل کرنے والے ہیں۔ اور ان دونوں کی روایت کا مدار ابن شہاب پر ہے ابن شہاب کے چار شاگرد سفیان بن عیینہ ‘ اسحاق بن راشد ‘ مالک ‘ ابن ابی ذئب رحمہم اللہ ہیں۔ ان میں سفیان و اسحاق کے الفاظ لحم حمار فردہ کے الفاظ ہیں۔ اور مالک و ابن ابی ذئب کے الفاظ حمارً ا وحشا یعنی زندہ شکاری جانور ہے۔
دوسرا اضطراب : سعید کے تین شاگرد ابوالہذیل ‘ حبیب بن ابی ثابت ‘ حکم بن عتیبہ ہیں۔ ان میں پہلے دو ابوالہذیل اور حبیب نے پورا جانور ہدیہ کرنے کو بیان کیا گویا آپ کے لیے ذبح کیا گیا۔
تیسرا اضطراب : حکم نے سرین یا ران کا تذکرہ کیا۔ ان شدید اضطرابات کی وجہ سے یہ متعین نہیں ہوسکتا ہے۔ زندہ شکار پیش ہوا یا ذبح شدہ۔ پس یہ روایت بھی قابل استدلال نہ رہی۔
فریق ثانی کا مؤقف اور دلیل :
محرم کے لیے اگر شکار کیا جائے تو اس کا استعمال حرام ہے۔ البتہ ویسے شکار کا گوشت کھانا جائز ہے۔ جیسا کہ حضرت عائشہ (رض) کی روایت میں ہے۔ دلیل آگے روایات ہیں۔