٣٧٢٤: عمیر بن سلمہ نے بنو بہز کے ایک آدمی سے بیان کیا کہ جناب رسول اللہ (صلی اللہ علیہ وآلہ وسلم) مقام روحاء کے پاس سے گزرے۔ اچانک ایک حمار وحشی جو کہ لنگڑا ہوچکا تھا اور تیر اس کی ٹانگ میں موجود تھا اس کی جان نکل چکی تھی آپ (صلی اللہ علیہ وآلہ وسلم) نے فرمایا اس کو اس وقت چھوڑ دو یہاں تک کہ اس کا شکاری آجائے۔ اسی وقت ایک بہزی آ نکلا اور کہنے لگا یارسول اللہ (صلی اللہ علیہ وآلہ وسلم) یہ میرے تیر سے شکار ہوا ہے۔ آپ اس کو استعمال فرمائیں۔ آپ (صلی اللہ علیہ وآلہ وسلم) نے ابوبکر (رض) کو حکم دیا کہ اپنے رفقاء میں تقسیم کردیں اس وقت وہ تمام احرام کی حالت میں تھے پھر آپ روانہ ہوگئے اور مقام اثابہ میں پہنچے تو ایک ہرن پہاڑی کے غار میں سایہ لے رہا تھا تیر اس کو لگا ہوا تھا اور وہ ابھی زندہ تھا۔ جناب رسول اللہ (صلی اللہ علیہ وآلہ وسلم) نے ایک آدمی کو فرمایا تم یہاں کھڑے ہوجاؤ تاکہ اس کو کوئی نہ دیکھے اور قافلہ کے ساتھی گزر جائیں (کیونکہ اگر کوئی محرم اس پر تعرض کرے گا تو کسی کے لیے حلال نہ رہے گا)