٣٧٦٤: نافع بیان کرتے ہیں کہ ابن عمر (رض) جب مکہ تشریف لائے تو بیت اللہ کا طواف کرتے اور رمل کرتے پھر صفا ومروہ کے درمیان سعی کرتے اور جب مکہ سے احرام باندھتے تو پھر رمل نہ کرے اور صفا ومروہ کی سعی کو یوم نحر پر مؤخر کرتے اور نحر کے دن طواف زیارت میں رمل نہ کرتے تھے۔ اس روایت میں ابن عمر (رض) سے یہ ثبوت مل رہا ہے کہ وہ حج میں اس وقت رمل نہ کرتے تھے جب کہ ان کا احرام غیر مکی ہوتا ۔ یہ روایت اس کے خلاف ہے جو مجاہد (رح) نے ان کے واسطہ سے جناب نبی اکرم (صلی اللہ علیہ وآلہ وسلم) سے نقل کی ہے۔ مجاہد (رح) نے جو بات نقل کی وہ دو حال سے خالی نہیں نمبر ١ وہ منسوخ ہے اور اس کی ناسخ اس سے اولیٰ ہے نمبر ٢ یہ ان سے صحیح سند سے ثابت نہیں پس ایسی روایت قابل عمل نہ ہوئی اور اس کے خلاف روایت پر عمل واجب ہوا۔ جب مذکور رمل جناب رسول اللہ (صلی اللہ علیہ وآلہ وسلم) سے مشرکین کے نہ ہونے کی حالت میں ثابت ہوگیا اور وہ بھی پہلے تین چکروں میں تو اس سے یہ بات پختہ ہوگئی کہ یہ طواف قدوم میں سنت ہے اور کسی مرد کو اس کا ترک مناسب نہیں جب کہ اسے اس کی قدرت ہو یہی امام ابوحنیفہ ابو یوسف ‘ محمد رحمہم اللہ کا قول ہے۔
حاصل روایات : اس روایت میں ابن عمر (رض) کا یہ طرز عمل معلوم ہو رہا ہے کہ جب مکہ کے باہر سے احرام باندھتے تو طواف میں رمل کرتے اور جب مکہ سے احرام حج باندھتے تو اس کے طواف میں رمل نہ کرتے۔
یہ روایت اس کے خلاف ہے جو فصل اول میں ان سے مجاہد (رح) نے نقل کی ہے اب روایت مجاہد کی دو صورتیں ہیں۔
نمبر 1: اس کو منسوخ تسلیم کیا جائے پس ناسخ روایت اس سے اولیٰ و اعلیٰ ہے۔
نمبر 2: سرے سے وہ روایت ہی درست نہیں پس اس پر عمل کرنا مناسب نہیں اس کے مخالف روایت جو کہ ثابت ہے اس پر عمل لازم ہے۔
جب سال مشرکین کے بعد جناب رسول اللہ (صلی اللہ علیہ وآلہ وسلم) اور آپ کے صحابہ کرام سے رمل ثابت ہے اور پہلے تین چکروں میں ثابت ہے اور طواف قدوم کی سنت ہے تو اب کسی کو حق نہیں پہنچتا کہ وہ قدرت کے باوجود اس کو ترک کرے۔
یہی ہمارے ائمہ ابوحنیفہ ‘ ابو یوسف ‘ محمد رحمہم اللہ کا قول ہے۔