٣٨٠٤: عطاء نے جابر (رض) کو بیان کرنے سنا کہ ہم نے جناب رسول اللہ (صلی اللہ علیہ وآلہ وسلم) کے ساتھ ذوالحلیفہ سے فقط حج کا احرام باندھا اس میں ہم نے عمرہ کی ملاوٹ نہ کی۔ ذی الحجہ کی چار تاریخ کو ہم مکہ پہنچے جب ہم طواف سے فارغ ہوچکے اور صفاء ومروہ کے مابین سعی بھی کرلی تو جناب رسول اللہ (صلی اللہ علیہ وآلہ وسلم) نے حکم فرمایا کہ ہم اس کو عمرہ بنالیں اور عورتوں سے خلوت کی بھی اجازت دی۔ ہم نے کہا ہمارے اور عرفہ کے درمیان اب صرف پانچ راتیں باقی ہیں تو کیا ہم عرفات اس حالت میں جائیں گے کہ ہمارے مذاکیر سے منی کے قطرات ٹپک رہے ہوں گے اس پر جناب رسول اللہ (صلی اللہ علیہ وآلہ وسلم) نے ارشاد فرمایا میں تم میں سب سے زیادہ نیک اور سچا ہوں۔ اگر ہدی نہ ہوتی تو میں بھی حلال ہوجاتا۔ یہ بات سن کر سراقہ بن مالک کھڑے ہوئے اور کہنے لگے یارسول اللہ (صلی اللہ علیہ وآلہ وسلم) آپ نے اس کو ہمارے اس سال کے لیے تمتع بنادیا یا ہمیشہ ہمیش کے لیے ؟ آپ (صلی اللہ علیہ وآلہ وسلم) نے فرمایا۔ بلکہ ہمیشہ ہمیشہ کے لئے۔ تو حضرت سراقہ (رض) کا وہ سوال جو اس روایت میں مذکور ہے۔ وہ حج تمتع سے متعلق تھا یعنی ہم اپنے اس حج میں سے پہلے عمرہ میں داخل ہوئے پھر اس سے حلال ہونے کے بعد ہم نے حج کا احرام باندھا اس سے ہم متمتع بن گئے تو کیا یہ ہمارا تمتع اس سال کے ساتھ خاص ہے کہ اسے آئندہ نہ کریں یا ہمیشہ کے لیے ہے ہم عمرہ کو حج کے ساتھ کریں گے جیسا اس سال ہم نے تمتع کیا تو جناب رسول اللہ (صلی اللہ علیہ وآلہ وسلم) نے فرمایا بلکہ ہمیشہ کے لیے یہ اسی طرح ہے۔ یہ بات اس طرح نہ تھی کہ ان کے لیے جائز ہے کہ وہ حج سے عرفات سے پہلے ہی طواف بیت اللہ سعی صفاومروہ کر کے فارغ ہوجائیں عنقریب ہم اپنی اسی کتاب میں یہ ذکر کریں گے کہ ان کا یہ حلال ہونا جو عرفہ سے پہلے پیش آیا یہ انہی کے ساتھ خاص تھا یہ بعد والوں کے لیے درست نہیں ہم اسے اس کے موقعہ پر بیان کریں گے۔
تخریج : ابن ماجہ فی المناسک باب ٤١۔
قول طحاوی (رح) :
اس روایت سے معلوم ہو رہا ہے کہ سراقہ (رض) کا سوال متعہ حج کے سلسلہ میں تھا کہ ہمارا یہ حج جس کی ابتداء ہم نے عمرہ سے کی پھر ہم اس سے حلال ہو کر حج کا احرام باندھیں گے تو اس سے ہم متمتع ہوجائیں گے کیا یہ تمتع ہمارے اسی سال کے ساتھ خاص ہے کہ بعد میں ہم نہیں کرسکتے یا ہمیشہ کے لیے ہے کیا ہم عمرہ کو حج کے ساتھ ملا کر تمتع کریں جیسا کہ ہم نے اس سال تمتع کیا ؟ تو جناب رسول اللہ (صلی اللہ علیہ وآلہ وسلم) نے فرمایا بلکہ ہمیشہ کے لیے اس کا یہ مطلب نہیں کہ ان کے لیے بعد میں یہ حکم ہے کہ حج کے احرام سے عرفہ سے پہلے طواف بیت اللہ اور سعی صفا سے حلال ہوں۔ عنقریب ہم جناب رسول اللہ (صلی اللہ علیہ وآلہ وسلم) سے ذکر کریں گے کہ حکم انہی کے لیے خاص تھا بعد والوں کے لیے نہ تھا۔ ہم یہ اپنے موقعہ پر ذکر کریں گے۔