٣٨٥٠: ابوالزبیر (رض) نے جابر بن عبداللہ (رض) سے سنا کہ جناب نبی اکرم (صلی اللہ علیہ وآلہ وسلم) اور آپ کے اصحاب نے صفا ومروہ کے درمیان ایک طواف کیا ہے۔ اس سے حضرت جابر (رض) کا مقصد یہ ہے کہ ان کو بتلانا چاہتے ہیں صفا ومروہ کی سعی یوم نحر کے طواف میں نہیں کی جاتی اور نہ طواف صدر میں کی جاتی ہے۔ جیسا طواف قدوم میں کی جاتی ہے مگر اس روایت کے کسی حصہ میں یہ ثبوت نہیں ہے کہ قارن پر اس کے حج وعمرہ کا ایک طواف ہے یا دو طواف ہیں۔ اگر کوئی معترض یہ کہے کہ حضرت ابن عمر (رض) سے قارن کے متعلق صحیح روایت میں ثابت ہے کہ وہ اپنے حج وعمرہ میں ایک طواف کرتے تھے ۔ تو اس سلسلہ میں ان کا قول ترک کر کے ان کے خلاف کس کا قول لیتے ہو۔ تو ان کو جواب میں کہا جائے گا۔ ہم ان کا قول چھوڑ کر حضرت علی اور ابن مسعود (رض) کے قول کو اختیار کرتے ہیں۔ جو کہ ذیل میں مذکور ہے۔
حاصل روایات : اس روایت سے جابر (رض) یہ خبر دینا چاہتے ہیں کہ صفا ومروہ کے درمیان سعی یوم نحر والے طواف میں نہیں کی جاتی اور نہ طواف صدر میں کی جاتی ہے جیسا کہ طواف قدوم میں کی جاتی ہے۔
پس اس روایت میں اس بات کی کوئی دلیل نہیں کہ قارن پر اس کے حج وعمرہ کا ایک طواف یا دو طواف لازم ہیں۔ پس یہ اشکال بھی بےحقیقت ہے۔
اشکال دوم : حضرت عمر (رض) سے ثابت ہے کہ قارن اپنے حج قران میں ایک طواف کرے گا اس میں ان کے قول کو کس کے مخالف قرار دو گے۔
حج قران میں دو طواف اور دو سعی کے لیے ہم حضرت علی اور ابن مسعود (رض) کے قول کو اختیار کریں گے چنانچہ قول علی (رض) ملاحظہ ہو۔