٣٨٦٤: عبدالرحمن بن یزید کہتے ہیں کہ میں حضرت ابن مسعود (رض) کے ساتھ مکہ کی طرف نکلا جب ہم مزدلفہ میں آئے آپ نے دو نمازیں پڑھائیں ہر ایک ایک اذان اور اقامت سے ادا فرمائی اور ان کے درمیان کوئی نماز (نفلی) نہیں پڑھی۔
تخریج : بخاری فی الحج باب ٩٨۔
باب کے عنوان سے تو صرف مزدلفہ میں دو نمازوں کو جمع کا مسئلہ بیان کرنا مقصود ہے مگر ضمناً اس عنوان کے تحت جمع بین الصلاتین فی العرفات بھی ذکر کردیا جائے گا اسی طرح منیٰ میں قصر صلوۃ کا مسئلہ بھی مذکور ہوگا عرفات کے میدان میں مسافر امام تو بالاتفاق دو رکعت پڑھائے گا اور اس کی اقتداء میں مسافر تو قصر کریں گے مقیمین کے متعلق امام مالک قصر کے قائل ہیں البتہ ائمہ ثلاثہ قصر کی بجائے اتمام کو لازم کہتے ہیں موجودہ زمانہ میں امام حج مسافر ہے اس لیے مسافروں کو جماعت کے ساتھ قصر لازم ہے۔ عرفات میں عصر کو ظہر کے وقت میں جمع تقدیم کے ساتھ امام ابوحنیفہ احمد ‘ مالک کے ہاں ایک اذان اور دو اق امتوں سے ادا کریں گے۔ امام مالک کے مشہور قول میں دو اذان اور دو اقامت کے ساتھ ادا کی جائیں گی۔ اب رہا مزدلفہ میں جمع تاخیر ہوگی مغرب کو عشاء کے وقت ادا کریں گے ۔ ! امام مالک دو اذان اور دو اقامت سے نماز کو واجب کہتے ہیں۔
نمبر 1: احناف کے ہاں ایک اذان اور ایک اقامت سے دونوں نمازیں ادا کی جائیں گی۔
نمبر 2: امام احمد ‘ شافعی کے ہاں ایک اذان اور دو اقامت کے ساتھ دونوں نمازیں ادا کی جائیں۔
فریق اوّل کا مؤقف اور دلیل : مغرب و عشاء کو جمع تاخیر کے ساتھ دو اذان اور دو اقامت سے ادا کریں ذہب قوم الی ہذین سے یہی مراد ہیں۔ دلائل یہ ہیں۔