٣٨٧٩: سالم نے اپنے والد سے انھوں نے جناب نبی اکرم (صلی اللہ علیہ وآلہ وسلم) سے روایت کی ہے کہ جناب نبی اکرم (صلی اللہ علیہ وآلہ وسلم) نے مزدلفہ میں دو نمازوں کو جمع کیا ان میں سے ہر ایک میں اذان نہیں دی فقط اقامت کہی۔ اور ان کے درمیان کوئی نفل نماز ادا نہیں کی۔ اس روایت میں ان کا یہ قول (ولم یناد فی کل واحدۃ منھما الا باقامۃ) کہ اقامت کے علاوہ ان میں سے کسی میں بھی اذان نہیں دی گئی ” اس میں دو احتمال ہیں نمبر ١ اس سے مراد وہ اقامت ہے جو ہر ایک کے لیے کہی گئی نمبر ٢ اس سے وہ اقامت مراد ہو جو دونوں کے لیے کہی گئی۔ البتہ ہمارے ہاں اس کا بہتر مطلب یہ ہے کہ اس سے وہ اقامت مراد لیجائے جس سے دونوں نمازوں کو قائم کیا گیا تاکہ اس روایت اور اس قبل منقولہ روایات کا معنی متضاد نہ ہو۔ ابن جبیر نے ابن عمر (رض) کی وساطت سے جناب رسول اللہ (صلی اللہ علیہ وآلہ وسلم) سے اور ابو ایوب انصاری اور براء بن عازب (رض) سے اس کے موافق روایت نقل کی ہے۔
الم یناد فی کل واحدۃ منہما الا باقامۃ اس جملے میں دو احتمال ہیں نمبر ایک ہر ایک کے لیے اقامت کہی۔ نمبر دو دونوں کے لیے ایک اقامت کہی۔ ہم دوسرا معنی لیتے ہیں تاکہ سعید بن جبیر نے ابن عمر (رض) سے جو روایت نقل کی ہے اس کے ساتھ اس کی موافقت ہوجائے۔
اور ابو ایوب انصاری (رض) براء بن عازب (رض) سے اس کے موافق روایات وارد ہیں۔ روایت ابو ایوب انصاری (رض) ۔