٣٩٠٧: سالم بن شوال نے ام حبیبہ (رض) سے سنا کہ وہ فرماتی تھیں ہم جناب رسول اللہ (صلی اللہ علیہ وآلہ وسلم) کے زمانہ میں اندھیرے میں مزدلفہ سے منیٰ چلی جاتیں تھیں۔ اس روایت میں یہ ہے کہ وہ لوگ طلوع فجر کے بعد منیٰ کی طرف واپس آتے تھے اور یہ روایت اول کے مخالف ہے اور اس سے پہلے باب میں حضرت اسماء (رض) کی روایت کے ضمن میں ذکر کیا کہ انھوں نے کنکریاں ماریں اور پھر وہ اپنی منزل کی طرف لوٹ آئیں پھر نماز فجر ادا کی تو ان کو عبداللہ نے کہا کہ آپ نے ہمیں اندھیرے میں اٹھا دیا تو انھوں نے جواب دیا کہ جناب رسول اللہ (صلی اللہ علیہ وآلہ وسلم) نے عورتوں کو کوچ کی اجازت دی ہے۔ تو حضرت اسماء (رض) نے بتلادیا ہے کہ جناب رسول اللہ (صلی اللہ علیہ وآلہ وسلم) نے عورتوں کو جس بات کی اجازت دی وہ مزدلفہ سے واپسی تھی تاکہ وہ منیٰ پہنچ کر صبح کی نماز ادا کرسکیں۔ جب ہشام (رح) کی روایت میں یہ اضطراب مذکورہ پایا گیا تو پھر حماد بن سلمہ کی روایت پر عمل محمد بن حازم (رح) کی روایت سے اولیٰ نہ ہوگا ۔ حالانکہ حماد بن سلمہ (رح) نے اپنی روایت میں ذکر کیا ہے کہ جناب رسول اللہ (صلی اللہ علیہ وآلہ وسلم) نے امّ سلمہ (رض) کو اس لیے جلد جانے کا حکم فرمایا کہ وہ ان کی باری کا دن تھا اور آپ ان سے ازدواجی تعلق چاہتے تھے ‘ اور جناب رسول اللہ (صلی اللہ علیہ وآلہ وسلم) نے اس دن ابھی منیٰ سے کوچ نہیں فرمایا تھا اور نہ ہی آپ نے رات تک طواف زیارت کیا تھا۔
تخریج : مسلم فی الحج ٢٩٩۔
یہ روایت بتلا رہی ہے کہ وہ طلوع فجر کے بعد روانہ ہوتے اور شروع باب والی روایت اس کے خلاف ہے اور اس سے پہلے باب میں اسماء (رض) کی روایت بیان کرچکے ہیں کہ انھوں نے رمی کی پھر اپنے ٹھکانا پر لوٹ کر نماز فجر ادا کی تو ان کو عبداللہ (رض) نے کہا (اماں جان ! ) آپ نے اندھیرے میں جلد روانگی اختیار کی ہے تو اسماء (رض) نے جواب دیا جناب رسول اللہ (صلی اللہ علیہ وآلہ وسلم) نے کوچ کی ہمیں رخصت دی ہے اس سے معلوم ہوا کہ ان کو ایسے وقت کوچ کی اجازت دی تھی کہ وہ نماز صبح منیٰ میں ادا کریں۔ اب روایت ہشام بن عروہ میں اضطراب ثابت ہوا تو حماد بن سلمہ کی روایت پر عمل کرنا محمد بن حازم کی روایت پر عمل سے بہتر نہ رہا۔ اور حماد بن سلمہ کی روایت میں یہ ہے کہ امّ سلمہ (رض) کی تعجیل کا مقصد یہ تھا کہ وہ یوم نحر سے اگلے دن مکہ پہنچ جائیں۔ تاکہ ان کی باری کا حق ادا ہو اور اس کی ادائیگی جناب رسول اللہ (صلی اللہ علیہ وآلہ وسلم) کے منیٰ جانے رمی کرنے اور پھر نحر کر کے طواف زیارت کرنے پر موقوف ہے حالانکہ آپ (صلی اللہ علیہ وآلہ وسلم) تو ابھی مزدلفہ میں ہی تشریف فرما تھے۔ نہ منیٰ گئے نہ نحر کیا نہ طواف زیارت۔
یہ روایت اس بات کی تصدیق کرتی ہے کہ آپ (صلی اللہ علیہ وآلہ وسلم) نے طواف زیارت رات کو کیا۔