٣٩٢٠: عکرمہ کہتے ہیں کہ میں حسین بن علی (رض) کے ساتھ وقوف کررہا تھا وہ جمرہ عقبہ کی رمی تک تلبیہ پڑھتے رہے۔ میں نے پوچھا۔ اے عبداللہ یہ کیا ہے ؟ تو انھوں نے فرمایا میرے والد ایسا کرتے تھے اور انھوں نے مجھے بتلایا کہ جناب رسول اللہ (صلی اللہ علیہ وآلہ وسلم) اسی طرح کرتے تھے۔ عکرمہ کہتے ہیں کہ میں ابن عباس (رض) کی خدمت میں آیا اور میں نے ان کو اس کی اطلاع دی تو انھوں نے فرمایا۔ حسین (رض) نے سچ کہا مجھے میرے بھائی فضل (رض) نے اطلاع دی کہ جناب رسول اللہ (صلی اللہ علیہ وآلہ وسلم) آخر تک تلبیہ کہتے رہے۔ اور ان کی بات اولیٰ ہے کیونکہ وہ جناب رسول اللہ (صلی اللہ علیہ وآلہ وسلم) کے پیچھے اونٹنی پر سوار تھے۔