٣٩٣٩: عبدالرحمن بن یزید کہتے ہیں کہ میں عبداللہ کے ساتھ عرفات میں موجود تھا عبداللہ نے تلبیہ کہا اور وہ تلبیہ پڑھتے رہے یہاں تک کہ جمرہ عقبہ کے پاس آئے ایک آدمی کہنے لگا یہاں یہ تلبیہ پڑھنے والا کون ہے ؟ عبداللہ نے اپنے تلبیہ میں ایسی چیز کہی جو میں نے کسی سے نہیں سنی وہ یہ کلمات تھے : لبیک عدد التراب ان روایات میں یہ بات موجود ہے کہ جناب عمر (رض) عرفہ میں منبر پر تلبیہ کہتے تھے اور ابن زبیر (رض) نے بھی معلوم ہونے پر اس عمل کو اپنایا جب کہ حضرت اسود (رح) نے ابن زبیر (رض) کو یہ بتلایا تو اطراف والوں میں سے کسی شخص نے ان پر اعتراض نہ کیا پس یہ اجماع اور مستقل دلیل ہے۔ یہ ابن مسعود (رض) ہیں جنہوں نے یہی طرز اختیار کیا۔ تو جن لوگوں کا ہم نے تذکرہ کیا تو چونکہ انھوں نے جناب رسول اللہ (صلی اللہ علیہ وآلہ وسلم) کی موافقت کی ہے۔ پس ان کے عمل نے یہ ثابت کردیا کہ جمرہ عقبہ کی کنکریاں یوم نحر کے دن مارنے تک تلبیہ کو ترک نہ کیا جائے۔ چنانچہ امام بو حنیفہ ابو یوسف و محمد رحمہم اللہ کا قول یہی ہے۔
حاصل آثار : ان آثار سے یہ بات ثابت ہوتی ہے کہ عرفات میں عمر (رض) تلبیہ پڑھتے تھے اس حال میں کہ وہ منبر پر بیٹھے ہوئے تھے اور ان کے بعد ابن الزبیر (رض) نے بھی اسی طرح کیا جب ان کو اسود نے عمر (رض) کے متعلق اطلاع دی۔ اس بات کو کسی نے ناپسند نہیں کیا یہ اجماع اور حجت ہے اور ابن مسعود (رض) بھی اس کو کر رہے ہیں اس سے ثابت ہوا کہ ان کا فعل جناب رسول اللہ (صلی اللہ علیہ وآلہ وسلم) کے فعل کے موافق ہے حج میں رمی جمرہ عقبہ تک تلبیہ روکا نہ جائے گا یہی امام ابوحنیفہ ‘ ابو یوسف ‘ محمد (رح) کا قول ہے۔