٣٩٥٣: حسن عرنی نے ابن عباس (رض) سے روایت کی ہے کہ جب تم جمرہ عقبہ کی رمی کرلو تو عورتوں کے علاوہ تمہارے لیے ہر چیز حلال ہوجاتی ہے ان کو ایک آدمی نے پوچھا کیا خوشبو بھی۔ تو انھوں نے فرمایا میں نے تو جناب رسول اللہ (صلی اللہ علیہ وآلہ وسلم) کو دیکھا کہ آپ کا سر مبارک کستوری سے لت پت تھا۔ تم بتلاؤ کیا وہ خوشبو ہے ؟ اس روایات حضرت ابن عباس (رض) کا قول کہ عورتوں کے سواء ہر چیز حلال ہوگئی جب کہ جمرہ عقبہ کو کنکریاں ماری ہیں “ ذکر کیا ہے۔ انھوں نے اس روایت سر منڈانے کا تذکرہ نہیں کیا اور اس روایت یہ بات بھی موجود ہے کہ انھوں نے جناب رسول اللہ کو دیکھا کہ آپ نے سر مبارک پر کستوری لگائی مگر اس روایت میں یہ اطلاع موجود نہیں کہ آپ نے یہ عمل کس وقت کیا ۔ عین ممکن ہے کہ آپ نے سرمنڈانے سے پہلے یہ فعل کیا ہو اور عین ممکن ہے کہ حلق کے بعد ایسا کیا ہو ۔ زیادہ بہتر بات یہ ہے کہ اس اجمال کو اسی وضاحت پر محمول کریں جو اس روایت عائشہ صدیقہ (رض) میں ہے۔ نہ کہ اس کے خلاف۔ پس اس صورت میں یہ جمرہ کی کنکریوں اور حلق کے بعد ہوگا جیسا حضرت صدیقہ (رض) نے ذکر کیا۔ پھر ابن عباس (رض) نے فرمایا کہ میری رائے یہ ہے کہ جب رمی کرلی تو رمی سے ہی یہ حلال ہوگیا کہ وہ حلق کروائے اور اس کے لیے لباس و خوشبو درست ہوگئے۔ یہ موقعہ غور وفکر کا ہے۔ کہ احرام تو سرمنڈانے اور لباس پہننے اور خوشبو سے روکتا ہے۔ پس یہ اس بات پر محمول کیا جائے کہ جب سرمنڈانا جائز ہوگیا تو تمام چیزیں اسے جائز ہوگئیں اور یہ بھی احتمال ہے کہ وہ اس وقت تک حلال نہیں جب تک حلق کروا نہیں لیتا۔ جب اس بات کو جانچا تو یہ معلوم ہوا کہ عمرہ کرنے والے پر وہی چیزیں حرام ہوتی ہیں ‘ جو احرام حج سے حرام ہوتی ہیں۔ پھر دوسری بات یہ بھی پائی کہ جب اس نے طواف اور سعی صفا ومروہ کرلیا توا سے سرمنڈانا درست ہوجاتا ہے مگر عورتیں اس کے لیے حلال نہیں ہو تیں اور نہ خوشبو لگانا اور نہ لباس پہننا جائز ہوتا ہے جب تک سرنہ منڈوا لے۔ پس جب عمرہ کی حرمت قائم ہے تو حلق حلال ہوگیا ۔ مگر جواز حلق سے وہ اس آدمی کے حکم میں نہیں جس کو لباس اور خوشبو جائز ہو اور حج میں بھی اسی طرح ہے۔ کہ جب حلق جائز ہوا تو اس کی وجہ سے احرام کی وجہ سے جو امور حرام ہوتے تھے وہ سب جائز نہیں ہوجاتے ۔ وہ تب حلال ہوتے ہیں جب سرمنڈالے۔ یہ اس بات پر قیاس کیا ہے جو سب کے ہاں عمرہ میں اتفاقی ہے۔ اب ہم ان دونوں اول قول والے لوگوں کے اقوال کی طرف لوٹتے ہیں جنہوں نے حضرت عکاشہ (رض) کی روایت اختیار کی ہے۔ پس ہم نے یہ بات پائی کہ احرام سے پہلے آدمی کے لیے عورتوں کے پاس جانا ‘ خوشبو ملنا ‘ لباس پہننا اور شکار کرنا ‘ سرمنڈانا اور وہ تمام اشیاء کرنا جائز ہے۔ جو احرام کی وجہ سے حرام ہوجاتی ہیں۔ پھر جب وہ احرام باندھ لیتا ہے تو ایک سبب سے اس پر یہ تمام کام حرام ہوجاتے ہیں۔ اور وہ احرام ہے۔ پس یہ احتمال ہے کہ جیسا ایک سبب سے حرام ہوتے تو ایک سبب سے حلال ہوجاتے ہیں اور یہ بھی احتمال ہے کہ مختلف چیزوں سے حلال ہوں ہم نے اسے جانچا تو اس پرا جماع پایا کہ جب اس نے جمرہ عقبہ کی رمی کرلی تو اس کے لیے حلق جائز ہوگیا اس پر تو کسی بھی فرد مسلمان کو اختلاف نہیں اور اس پر اتفاق ہے کہ پہلی حالت میں اس کے لیے جماع حرام ہے۔ پس اس سے یہ بات ثابت ہوگئی کہ وہ امور جو اس پر ایک سبب سے حرام ہوتے ہیں مختلف اسباب سے وہ ان سے حلال ہوجاتا ہے۔ اس سے مذکورہ علت باطل ہوگئی۔ پس جب یہ بات ثابت ہوگئی کہ رمی سے حلق درست ہوجاتا ہے تو سرمنڈانے کے بعد جسم کے ہر حصہ کے بال مونڈنا جائز ہوجاتے ہیں۔ اور اسی طرح ناخن ترشوانا بھی۔ اب ہم یہ معلوم کرنا چاہتے ہیں کہ آیا لباس کا حکم یہی ہے یا اس سے مختلف جماع کی طرح ہے۔ کہ وہ جماع کے جواز تک جائز نہ ہوگا۔ ہم نے غور کیا کہ حج کا احرام باندھنے والا اگر عرفات سے قبل جماع کرے تو اس کا حج فاسد ہوجاتا ہے اور یہ بھی معلوم و معروف ہے کہ اگر وہ اپنے بال ‘ ناخن ترشوائے تو اس پر فدیہ ضروری ہوجائے گا مگر حج فاسد نہ ہوگا۔ اگر اس نے وقوف عرفات سے پہلے کپڑے پہن لیے تو اس سے اس کا احرام فاسدنہ ہوگا البتہ فدیہ لازم ہوجائے گا پس معلوم ہوگیا کہ لباس کا حکم وقوف عرفات سے پہلے پہلے بال کاٹنے اور ناخن تراشنے کی طرح ہے۔ جماع جیسا نہیں تو قیاس اس بات کا متقاضی ہے کہ رمی و حلق کے بعد اس کا حکم ان دونوں جیسا ہو جماع جیسا نہ ہو قیاس کا تقاضا یہی ہے۔ اگر کوئی شخص یہ اعتراض کرے کہ ہم جانتے ہیں کہ محرم کو حلق کے بعد بوسہ حرام ہے اور وقوف سے پہلے یہ لباس کی طرح ہے جماع کی طرح نہیں تو حلق کے بعد بھی مناسب یہ ہے کہ لباس بوسہ کے حکم جیسا ہو۔ تو اس کے جواب میں یہ کہا جائے گا۔ کہ لباس بوسہ کے مقابلے میں سرمنڈانے کے ساتھ زیادہ مشابہت رکھتا ہے۔ کیونکہ بوسہ اسباب جماع سے شمار ہوتا ہے تو اس کا حکم جماع کے حکم کی طرح ہوگا ۔ جب وہ حلال ہوگا تو یہ بھی حلال ہوگا ۔ جب وہ حرام ہوگا تو یہ بھی حرام ہوگا اور غور وفکر سے یہ معلوم ہوتا ہے کہ حلق اور لباس دونوں جماع کے اسباب سے نہیں بلکہ وہ درستی بدن کے من جملہ اسباب سے ہیں تو ان میں سے ہر ایک کا حکم ایک دوسرے سے ملانا زیادہ مناسب ہے ‘ بجائے اس کے کہ اسے بوسہ کے ساتھ ملائیں ۔ اس تمام بحث سے ثابت ہوگیا کہ کنکریاں مارنے اور سرمنڈانے کے بعد لباس زیب تن کرنے میں کچھ حرج نہیں ۔ کئی صحابہ کرام (رض) سے بھی یہ منقول ہے ملاحظہ ہو۔
حاصل روایت : اس روایت میں رمی جمرہ کا تذکرہ ہے اور اس کے بعد ہر چیز سوائے عورتوں کے حلال ہونے کا ذکر ہے مگر حلق کا تذکرہ نہیں۔ اسی طرح آپ کے سر مبارک کے خوشبو سے لت پت ہونے کا ذکر کیا مگر اس کا وقت نہیں بتلایا۔ یہ حلق سے پہلے اور بعد دونوں امکان رکھتا ہے البتہ سابقہ روایت کی موافقت کا تقاضا یہ ہے کہ جمرہ عقبہ کی رمی اور حلق کے بعد کی بات ہے جیسا کہ روایت عائشہ (رض) میں مذکور ہے پھر ابن عباس (رض) نے اپنے خیال اور رائے سے یہ فرمایا کہ رمی کے بعد حلق درست ہے اور اس کے لیے لباس پہننا اور خوشبو لگانا جائز ہے۔
نظر کا تقاضا :
غور کرنے سے یہ بات سامنے آتی ہے کہ احرام نے حلق سر ‘ لباس ‘ خوشبو سب کو حرام کردیا۔ پس یہ قرین قیاس ہے کہ جب سر منڈوانا جائز ہوجائے تو یہ سب جائز ہوجائیں اور یہ بھی ممکن ہے کہ حلق تک حلال نہ ہوں۔ ہم نے اعتبار کرتے ہوئے دیکھا کہ معتمر پر اس کے احرام سے وہ تمام چیزیں حرام ہوجاتی ہیں جو حج کے احرام سے حرام ہوتی ہیں عمرے میں غور کیا کہ سعی صفا ومروہ کے بعد حلق بھی حلال ہوگیا مگر عورتیں ‘ خوشبو ‘ لباس حلق کے بعد حلال ہوتا ہے۔
پس جب عمرہ کی حرمت باقی ہے تو اس کے لیے حلق کروانا تو حلال ہے مگر حلق کے حلال ہونے سے وہ حلال کے حکم میں نہیں ہوا کہ اس کو لباس و خوشبو حلال ہو۔ اسی طرح یہ بھی پسندیدہ نہیں کہ اب اس کو حلق درست ہوگیا اور اس کے ماسواء چیزیں بھی حلال ہوگئیں جب تک کہ وہ حلق نہ کر والے۔ نظر کا تقاضا یہی ہے۔
نظر ثانی : احرام سے پہلے اس کو عورتیں ‘ خوشبو ‘ لباس ‘ شکار ‘ حلق یہ سب چیزیں حلال تھیں جب احرام باندھ لیا تو احرام سے سب حرام ہوگئیں۔ اب احرام کھولتے وقت دو احتمال ہیں۔ نمبر ایک کہ تمام یکبارگی حلال ہوجائیں۔ نمبر دو یکے بعد دیگرے حلال ہوں۔ غور کرنے سے معلوم ہوا کہ اس بات پر سب متفق ہیں کہ جب وہ رمی کرے تو اس کو حلق حلال ہوجاتا ہے اس میں کسی کا اختلاف نہیں اور اس پر بھی اتفاق ہے کہ جماع حرام ہے۔ پس اس سے یہ ثابت ہوا کہ ایک سبب کے حرام ہونے والی اشیاء مختلف طور پر حلال ہوئیں پس یکبارگی حلال ہونے کا احتمال باطل ہوا۔
اب جبکہ رمی سے اس کو حلق حلال ہوا ہے تو اسے جسم کے تمام بال مونڈنے درست ہیں۔ اسی طرح ناخن کاٹنا نہانا وغیرہ۔ اب دیکھنا یہ ہے کہ آیا اس کا حکم جماع کی طرح ہے یا نہیں کہ جب جماع حلال ہو تو یہ حلال ہو۔
غور کرنے سے معلوم ہوا کہ محرم بالحج وقوف عرفات سے پہلے جماع کرے تو اس کا حج فاسد ہوجاتا ہے مگر بال کاٹنے یا ناخن کاٹنے سے حج فاسد نہیں ہوتا صرف فدیہ لازم آتا ہے اسی طرح اگر اس نے کپڑا پہن لیا پھر بھی حج فاسد نہ ہوگا اور نہ احرام۔ البتہ فدیہ لازم ہوگا۔
حاصل روایت : اب نتیجہ یہ نکلا کہ لباس اور بال کاٹنے کا حکم وقوف عرفات سے پہلے برابر ہے مگر جماع کا حکم ان دونوں سے مختلف ہے۔ پس نظر کا تقاضا یہ ہے کہ رمی و حلق کے بھی ایک جیسا رہے گا جماع کی طرح نہ ہوگا۔ پس رمی و حلق کے بعد لباس و طیب کا ایک حکم ہوگا۔
ایک اشکال بارد :
محرم کو بیوی کا بوسہ حرام ہے اور حلق کے بعد بھی حرام ہے وقوف عرفات سے پہلے یہ لباس کے حکم میں تھا جماع کے حکم میں نہ تھا پس حلق کے بعد بھی لباس جائز نہ ہونا چاہیے۔ بلکہ بوسے کی طرح حرام ہونا چاہیے۔
لباس کی مشابہت حلق کے ساتھ بوسے کی بنسبت زیادہ ہے اور قبلہ کی مشابہت لباس کے مقابلہ میں جماع سے زیادہ ہے کیونکہ : قبلہ اسباب جماع سے ہے تو جب جماع حرام ہے تو اسباب جماع بھی حرام ہونے چاہئیں اور جہاں جماع حلال ہوگا وہاں قبلہ بھی حلال ہوگا۔ لباس و حلق یہ اسباب جماع سے نہیں ہے بلکہ اصلاح بدن کے اسباب سے ہے فلہذا لباس کو حلق کے ساتھ زیادہ مشابہت کی وجہ سے حلق کے بعد پہننے کا جواز ہونا چاہیے پس ثابت ہوا کہ حلق کے بعد لباس میں حرج نہیں بوسہ میں حرج ہے۔