٣٩٦٨: عکرمہ کہتے ہیں کہ زید بن ثابت اور ابن عباس (رض) نے طواف زیارت کے بعد جس عورت کو حیض آجائے اس کے متعلق اختلاف کیا تو زید (رض) کہنے لگے اسے طواف وداع ضروری ہے ابن عباس (رض) کہنے لگے۔ اگر وہ پسند کرے تو کوچ کرسکتی ہے۔ انصار کہنے لگے۔ اے ابن عباس (رض) ہم تمہاری بات نہیں مانیں گے کیونکہ تم زید کی مخالفت کر رہے ہو۔ ابن عباس (رض) کہنے لگے تم امّ سلیم انصاریہ (رض) سے دریافت کرلو۔ انھوں نے امّ سلیم (رض) سے سوال کیا تو کہنے لگیں طواف زیارت کے بعد مجھے حیض شروع ہوا تو جناب رسول اللہ (صلی اللہ علیہ وآلہ وسلم) نے مجھے حکم دیا کہ تم کوچ کرو۔ حضرت صفیہ (رض) کو حیض شروع ہوگیا تو عائشہ (رض) کہنے لگیں تمہارا برا ہو تم نے ہمارے گھر والوں کو روک لیا۔ اس بات کا تذکرہ جناب رسول اللہ (صلی اللہ علیہ وآلہ وسلم) کے سامنے ہوا تو آپ نے کوچ کا حکم فرمایا۔
تخریج : مسند احمد ٦؍٤٣١۔