٣٩٨٣: عیسیٰ بن یونس نے عبیداللہ بن عمر عن نافع عن ابن عمر (رض) روایت کی ہے کہ جس نے اس بیت اللہ کا حج کیا تو اس کو طواف وداع کرنا چاہیے۔ سوائے حائضہ عورتوں کے ان کو جناب رسول اللہ (صلی اللہ علیہ وآلہ وسلم) نے رخصت دی ہے کہ وہ لوٹ جائیں۔ یہ آثار جناب رسول اللہ (صلی اللہ علیہ وآلہ وسلم) سے ثابت کر رہے ہیں کہ حائضہ طواف صدر سے پہلے کوچ کرسکتی ہے۔ جب کہ طہارت کی حالت میں وہ طواف زیارت کرچکی ہو اور حضرت زید بن ثابت اور ابن عمر (رض) جو کہ پہلے اس کے خلاف رائے رکھتے تھے انھوں نے اس طرف رجوع کیا اور حائض کے لیے رخصت کو تسلیم کیا ہے اور جو چیز دوسروں پر واجب ہوتی تھی ‘ اس سے ان عورتوں کو مستثنیٰ قرار دیا ہے۔ اس سے یہ بات ثابت ہوگئی کہ حضرت حارث بن اوس (رض) کی روایت اور قول عمر (رض) سے ان روایات کا منسوخ ہونا معلوم ہوگیا۔ یہ جس قول کی ہم نے وضاحت کی ہے۔ یہ امام ابوحنیفہ ‘ ابو یوسف ‘ محمد (رح) کا قول ہے۔
حاصل روایات : ان روایات سے یہ ثابت ہوتا ہے کہ جناب رسول اللہ (صلی اللہ علیہ وآلہ وسلم) نے حائضات کو طواف صدر سے لوٹنے کی اجازت مرحمت فرمائی مگر اس کی شرط یہ ہے کہ وہ طواف زیارت کرچکی ہوں۔
اور اصحاب رسول اللہ (صلی اللہ علیہ وآلہ وسلم) کی وہ جماعت جو اس بات کے معلوم ہونے سے پہلے اس کے خلاف فتویٰ دیتے تھے مثلاً زید بن ثابت (رض) ابن عمر (رض) انھوں نے رجوع فرما لیا جیسا ابن عمر (رض) کا فتویٰ نقل کرچکے ہیں۔
اس سے ثابت ہوا کہ یہ آثار حدیث حارث بن اوس (رض) اور حضرت عمر (رض) کی رائے کو منسوخ کرنے والے ہیں۔
یہ جو اوپر بیان کیا کہ حائضہ کو طواف صدر کئے بغیر لوٹنے کی رخصت ہے یہ ہمارے ائمہ ابوحنیفہ ‘ ابو یوسف ‘ محمد (رح) کا قول ہے۔