٣٩٩٩: حفصہ بنت عبدالرحمن نے اپنے والد سے بیان کیا کہ جناب رسول اللہ (صلی اللہ علیہ وآلہ وسلم) نے عبدالرحمن بن ابی بکر (رض) کو فرمایا تم اپنی بہن کو پیچھے سوار کرو اور تنعیم سے عمرہ کراؤ۔ جب تم ان کے ساتھ ٹیلوں سے اتر جاؤ تو ان کو حکم دو کہ وہ احرام باندھ لے یہ مقبول عمرہ ہے۔ امام طحاوی (رح) فرماتے ہیں کہ علماء کی ایک جماعت نے اس بات کو اختیار کیا کہ مکی کے لیے تنعیم کے علاوہ میقات نہیں مکہ والوں کے لیے تنعیم ہی میقات ہے۔ وہ لوگ جو احرام کا ارادہ رکھتے ہوں ان کو اس مقام سے بلا احرام گزرنا اسی طرح جائز نہیں جس طرح دیگر مواقیت سے بلا احرام گزرنے درست نہیں مگر دیگر حضرات نے ان سے اختلاف کرتے ہوئے کہا کہ اہل مکہ کی میقات احرام کے لیے حل ہے۔ حرم کے باہر جس جگہ سے بھی احرام باندھے اس کے لیے کافی ہے اس سلسلہ میں تنعیم اور دیگر مقامات برابر ہیں۔ ان کے ہاں اس کی دلیل یہ ہے کہ ممکن ہے کہ آپ (صلی اللہ علیہ وآلہ وسلم) نے تنعیم کا نام قریب ہونے کی وجہ سے لیا اس کا یہ معنیٰ ہرگز نہیں کہ دیگر مقامات اس کی طرح نہیں نمبر ٢ دوسرا احتمال یہ بھی ہے کہ آپ نے اہل مکہ اس میقات بنانے کا ارادہ فرمایا ہو تاکہ وہ اللہ سے دوسری جگہوں کی طرف تجاوز نہ کریں پس اس میں غور کیا تو یزید بن سنان کی روایت سامنے آئی۔
تخریج : ابو داؤد فی المناسک باب ٨٠‘ دارمی فی المناسک باب ٤١‘ مسند احمد ١؍١٩٨۔
حاصل روایات : ان دونوں روایات میں عمرہ کے لیے تنعیم کا حکم فرمایا ہے معلوم ہوتا ہے کہ مکی کو تنعیم سے عمرہ کرنا لازم ہے اور کسی جگہ سے اس کو عمرہ کرنا درست نہیں۔
فریق ثانی کا مؤقف :
مکی کو حل کے کسی بھی مقام سے عمرہ درست ہے اس میں کسی قسم کی کراہت لازم نہیں آتی۔
سابقہ مؤقف کا جواب :
تنعیم کا نام اس وقت اس لیے لیا گیا کیونکہ قریب ترین حل یہی ہے اس وجہ سے نہیں کہ دوسرے کسی حل سے عمرہ جائز نہیں اور یہ بھی ممکن ہے کہ مکہ والوں کے لیے یہ مقرر کرنا ہو کہ اس سے آگے وہ احرام کے لیے اور کسی مقام کی طرف تجاوز نہ کریں اب ان دونوں باتوں کو روایات کی روشنی میں دیکھتے ہیں۔