٤٠٠٨: عروہ نے عائشہ (رض) سے روایت کی ہے اور سالم نے ابن عمر (رض) سے روایت کی ہے کہ دو عائشہ صدیقہ (رض) اور ابن عمر (رض) اس متمتع کو ایام تشریق میں روزے کی اجازت دیتے تھے جو ہدی نہ رکھتا ہو اور پہلے دس دنوں میں روزے نہ رکھ سکا ہو۔ امام طحاوی (رح) فرماتے ہیں بعض علماء نے ان روایات کو اختیار کرتے ہوئے متمتع ‘ قارن اور محصر کے لیے ایام تشریق کے روزوں کو جائز قرار دیا ۔ جب کہ ان کے پاس ھدی نہ ہو اور انھوں نے حج سے پہلے والا روزہ بھی نہ رکھا ہو۔ ان کے علاوہ لوگوں کو ان دنوں میں روزے کی ممانعت ہے۔ ان کا استدلال ان روایات سے ہے۔ مگر دیگر حضرات نے ان سے مخالفت کرتے ہوئے فرمایا ۔ ان لوگوں اور دیگرلوگوں کو ایام تشریق میں کفارہ یا نفلی یا قضاء کسی قسم کا روزہ رکھنا درست نہیں کیونکہ جناب رسول اللہ (صلی اللہ علیہ وآلہ وسلم) نے اس سے منع فرمایا ہے۔ البتہ متمتع وقارن پر دو ‘ دو قربانیاں لازم ہوں گی ایک قرآن و تمتع کی وجہ سے ١ وروسری ہدی اور روزے کے بغیر احرام سے باہر آنے کی وجہ سے واجب ہوگی ۔ انھوں نے اس سلسلہ میں جناب رسول اللہ (صلی اللہ علیہ وآلہ وسلم) سے مروی روایات سے استدلال کیا ہے۔ روایات ذیل میں ہیں۔
حاصل روایت : متمتع اگر دم شکر نہ رکھتا ہو اور عشرہ ذی الحجہ میں روزے بھی نہ رکھے ہوں تو ایام تشریق میں اس کو تین دن روزے کی اجازت ہے۔
فریق ثانی کا مؤقف اور دلیل و جواب : جس متمتع کو دم شکر کی توفیق نہ ہو اور وہ ایام عشرہ میں تین روزے بھی نہیں رکھ سکا تو اب وہ ایام تشریق میں روزے نہیں رکھ سکتا بلکہ حلق سے پہلے اس پر دم لازم ہے اگر اس نے حلق کروا لیا تو پھر دو دم لازم ہوجائیں گے۔ ایام تشریق میں کفارات و تطوع ہر قسم کے روزے ممنوع ہیں۔ دلائل یہ ہیں۔