٤٠٦٤: یونس بن عبید صاحب الحلی کہتے ہیں کہ میں نے ابن عباس (رض) سے غلام کے متعلق سوال کیا کہ جب غلام حج کرے پھر آزاد کردیا جائے ؟ فرمایا اس پر حج لازم ہوگا۔ میں نے بچے کے متعلق پوچھا کہ وہ بچپن میں حج کرے پھر بالغ ہو ؟ تو آپ نے فرمایا اس پر حج لازم ہے۔ تمہارے ہاں یہ بات مانی ہوئی ہے کہ حدیث کا راوی اس کی مراد کو زیادہ جانتا ہے۔ یہ ابن عباس (رض) ہیں جن ہوں نے اس روایت کو جناب رسول اللہ (صلی اللہ علیہ وآلہ وسلم) سے اس باب کے شروع میں روایت کیا پھر انھوں نے وہ بات فرمائی جس کا ہم نے تذکرہ کیا ہے۔ تو تمہارے ضابطے کے مطابق یہ جناب رسول اللہ (صلی اللہ علیہ وآلہ وسلم) سے مروی روایت پر دلیل ہونی چاہیے۔ اگر کوئی معترض یہ کہے کہ تم کو کیسے معلوم ہوا کہ یہ حج فریضہ اسلام کی جگہ کافی نہیں ہے۔ تو اس کے جواب میں عرض کرتا ہوں کہ جناب رسول اللہ (صلی اللہ علیہ وآلہ وسلم) کا ارشاد گرامی ہے۔ تین آدمی مرفوع القلم ہیں نمبر ١ بچہ یہاں تک کہ بڑا ہوجائے (الحدیث) یہ روایت اپنی اسناد کے ساتھ اسی کتاب میں دوسرے موقع پر درج ہے۔ جب بچہ مرفوع القلم ہے۔ تو یہ خود ثابت ہوگیا کہ اس کا حج فرض نہیں ہے اور اس پر اجماع ہے کہ اگر کوئی بچہ نماز کے وقت نماز ادا کرے ۔ پھر اس نماز کے وقت میں بالغ ہوجائے تو اسے نماز کا دوبارہ پڑھنا ضروری ہے اور وہ نماز نہ پڑھنے والے کے حکم میں ہوگا ۔ جب سب کے اتفاق سے یہ بات ثابت ہوگئی کہ تو یہ ثابت ہوا کہ حج کا حکم بھی یہی ہے اور جب وہ حج کے بعد بالغ ہو تو وہ حج نہ کرنے والے کے حکم میں ہوگا اور اس پر دوبارہ حج فرض ہوگا۔ اگر کوئی معترض یہ کہے کہ حج کا حکم نماز کے حکم سے مختلف ہے۔ اس کی تفصیل یہ ہے کہ حج تو اس پر فرض ہے جو وہاں پہنچنے کی طاقت واستطاعت رکھتا ہے۔ اس کے سواء دوسرے پر فرض نہیں ۔ عدم استطاعت والے پر فرض نہیں جیسا کہ بچے کے بلوغ تک اس پر فرض نہیں پھر ان علماء کا اس پر اجماع ہے۔ جس شخص کے پاس خرچہ سفر نہ ہو اور وہ اپنے کو مشقت میں ڈال کر پیدل حج کرے ۔ تو یہ اس لے لیے کافی ہے۔ اگر اس کے بعد اس کو طاقت میسر آبھی جائے تب بھی اس پر حج فرض نہ ہوگا ۔ پہلا حج اس نے عدم استطاعت میں کیا۔ اس پر قیاس کا تقاضا یہ ہے کہ بچے کا حکم بھی یہی ہو۔ کہ جب بلوغت سے پہلے اس نے حج کرلیا اور اس وقت اس پر فرض نہ تھا تو یہ اس کے لیے کافی ہونا چاہیے بلوغت کے بعد اسے حج کی ضرورت نہ ہونی چاہیے۔ اس کے جواب میں یہ گ ہیں گے کہ جو وہاں تک پہنچنے کی طاقت نہیں رکھتا اس سے فرضیت کے ساقط ہونے کی وجہ یہ ہے کہ بیت اللہ تک پہنچ نہیں سکتا ۔ پس اگر پیدل چل کر بیت اللہ تک پہنچ جائے وہاں تک پہنچنے والوں کی طاقت حاصل کرنے والوں میں بن جائے اس وجہ سے اس پر حج لازم ہوگا ۔ اسی وجہ سے ہم کہتے ہیں کہ یہ حج اس کے لیے کافی ہے اور اس وجہ سے بھی کہ بیت اللہ پہنچنے پر وہ وہاں کا ساکن شمار ہوگا اور اس پر حج لاز ہوگا لیکن بچے پر بیت اللہ تک پہنچنے سے پہلے اور بعد دونوں صورتوں میں حج لازم نہیں ۔ کیونکہ وہ مرفوع القلم ہے۔ جب وہ اس کے بعد بالغ ہوگا تو اس پر حج فرض ہوگا ۔ اسی وجہ سے تو ہم کہتے ہیں جس نے قبل البلوغ حج کیا وہ اس کے لیے کفایت نہ کرے گا۔ اسے لیے سرے سے حج لازم ہوگا ۔ جیسا وہ شخص کرتا ہے جس نے اس سے پہلے حج نہ کیا جو۔ اس باب میں قیاس یہی ہے اور یہی امام ابوحنیفہ ابو یوسف و محمد رحمہم اللہ کا قول ہے۔
حاصل روایات : راوی حدیث کو خوب جانتا ہے ابن عباس (رض) نے پہلے جناب رسول اللہ (صلی اللہ علیہ وآلہ وسلم) سے وہ روایت کی جو مذکور ہوئی پھر یہ فتویٰ دیا اس سے ثابت ہوتا ہے کہ روایت کا جو معنی تم لے رہے ہو وہ درست نہیں۔
ایک اشکال :
آپ کو کیسے معلوم ہوا کہ بچے کا حج حجۃ الاسلام کی طرف سے کفایت نہ کرے گا۔
نوٹ : جناب رسول اللہ (صلی اللہ علیہ وآلہ وسلم) نے فرمایا تین قسم کے لوگ ہیں جو احکام کے مکلف نہیں ہیں اگر وہ ادا کریں تو یہ ان کی طرف سے نفل ہوگا۔ ایک بچہ ‘ دوسرا مجنون ‘ تیسرا سونے والا۔
تخریج : بخاری کتاب الطلاق باب ١١‘ الحدود باب ٢٢‘ ابو داؤد باب ١٧‘ ترمذی فی الحدود باب ١‘ نسائی فی الطلاق باب ٢١‘ ابن ماجہ فی الطلاق باب ١٥‘ دارمی فی الحدود باب ١‘ مسند احمد ١؍١٦‘ ٦؍١٠٠۔
پس بچہ جب فرائض کا مکلف نہیں تو حج بھی فریضہ ہے اس لیے جب وہ حج کرے گا تو اس کی طرف سے نفل ہوگا جس طرح بچہ فرض نماز ادا کرلیتا ہے تو اس کے بعد نماز کے وقت کے اندر بالغ ہوجائے تو اس پر نماز کا اعادہ ہے اور وہ نماز نہ پڑھنے والے کے حکم میں ہوجاتا ہے اور اس پر سب کا اتفاق ہے پس اسی طرح حج کا بھی حکم ہوگا کہ بلوغت کے بعد اس کا حج اسی طرح ہے جیسے اس نے حج نہیں کیا۔ فلہذا اس پر دوسرا حج لازم ہوگا۔
دوسرا اشکال :
آپ نے بچے کے حج کو بچے کی نماز پر قیاس کیا یہ قیاس مع الفارق ہے نماز کے لیے زادراہ کی شرط نہیں حج کے لیے بالغ ہونے کے باوجود زادراہ کی شرط لازم ہے کیونکہ بالغ ہونے کے بعد اگر زادراہ میسر نہیں مگر وہ پیدل حج کرے اور پھر امیر ہوجائے تو آپ اس پر حج کو دوبارہ لازم نہیں کرتے بلکہ اسی کو سمار کرتے ہیں تو حج کو حج پر قیاس کرو نہ کہ نماز پر۔ پس بچے کا حج جو بچپن میں کیا وہ حجۃ الاسلام شمار ہونا چاہیے۔
نوٹ : آپ نے غیر مکلف کو غیر مستطیع پر قیاس کیا جو کہ درست نہیں غیر مستطیع پر حج فرض نہ ہونے کی وجہ بیت اللہ تک پہنچنے کی طاقت نہ ہونا ہے جب اس نے مشقت اٹھا کر پیدل اس رکاوٹ کو دور کرلیا تو اب رکاوٹ ختم ہونے کی وجہ سے اس پر حج فرض ہوگیا۔ اور مکہ پہنچ کر وہ مکی کے حکم میں ہوگیا اہل مکہ پر حج کے لیے راستہ کی سہولت شرط نہیں جب یہ اس کے حل میں ہوا تو سہولت اس کے لیے شرط نہیں۔ جس طرح مشقت سے حج کرے گا ادا ہوجائے گا بخلاف بچے کے وہ تو بیت اللہ میں پہنچے یا نہ پہنچے بہر صورت غیر مکلف ہے فلہذا بلوغت کے بعد جب وہ فرض کا مخاطب بنے گا تو اس پر حج فرض ہوگا اور اسی وقت کی ادائیگی حجۃ الاسلام کی ادائیگی شمار ہوگی۔
اس باب میں نظر کا بھی یہی تقاضا ہے اور یہ امام ابوحنیفہ ‘ ابو یوسف ‘ محمد رحمہم اللہ تعالیٰ کا قول ہے۔