٤٠٨٩: عبدالملک بن جابر نے جابر بن عبداللہ (رض) سے روایت کی ہے کہ میں جناب رسول اللہ (صلی اللہ علیہ وآلہ وسلم) کی خدمت میں بیٹھا تھا کہ آپ نے اپنا قمیص گریبان سے پھاڑ دیا یہاں تک کہ اس کو اپنے دونوں پاؤں کی طرف سے نکالا۔ لوگوں نے جناب رسول اللہ (صلی اللہ علیہ وآلہ وسلم) کو دیکھا تو آپ (صلی اللہ علیہ وآلہ وسلم) نے فرمایا میں نے اپنے بدنہ کے متعلق جس کو میں نے روانہ کرنا تھا حکم دیا کہ آج فلاں مقام پر اس کو اشعار کیا جائے پس میں نے اپنا قمیص بھول کر پہن لیا چنانچہ میں نے پسند نہ کیا کہ قمیص کو سر سے نکالوں (اس لیے قدموں کی طرف سے نکالا) آپ (صلی اللہ علیہ وآلہ وسلم) نے بدنہ روانہ کر کے مدینہ منورہ میں قیام فرمایا تھا۔
تخریج : مسند احمد ٣؍٤٠٠۔
نمبر 1: امام ابوحنیفہ (رح) اس کو مکروہ کہتے ہیں اور امام ابوحنیفہ (رح) ومالک (رح) کے ہاں چھوٹے جانوروں کا قلادہ نہ ثابت ہے نہ مسنون البتہ امام شافعی ‘ احمد کے ہاں قلائد غنم بھی مسنون ہے۔ ہدی کا جانور قلادہ ڈال کر روانہ کردیا جائے تو امام شعبہ ‘ حسن بصری اور عطاء ‘ مجاہد رحمہم اللہ کے ہاں وہ محرم ہوجائے گا اور تمام احکامات محرم اس پر لاگو ہوجائیں گے۔ ائمہ اربعہ اور جمہور فقہاء و محدثین کے ہاں محرمات احرام ہدی کے ساتھ جانے سے لازم ہوتے ہیں۔
فریق اوّل کا مؤقف ہدی کو قلادہ ڈالنے یا اشعار کرنے سے محرم پر احرام کی تمام پابندیاں لازم ہوجاتی ہیں۔ دلیل یہ روایات ہیں۔