حاصل روایت : اس روایت سے معلوم ہو رہا ہے کہ آپ (صلی اللہ علیہ وآلہ وسلم) نے ذاتی طور پر ان کو پیغام نکاح دیا یہ اس بات کی کھلی دلیل ہے کہ نکاح کے معاملہ کا اختیار عورت کو حاصل ہے اس کے اولیاء کو نہیں۔ چنانچہ جب امّ سلمہ (رض) نے یہ گزارش کی کہ میرے اولیاء میں سے کوئی بھی یہاں موجود نہیں تو آپ (صلی اللہ علیہ وآلہ وسلم) نے ارشاد فرمایا ان میں سے کوئی حاضر و غائب اس بات کو ناپسند نہ کرے گا اس کے بعد امّ سلمہ (رض) نے اپنے بیٹے عمر کو فرمایا اے عمر اٹھو ! اور حضور (صلی اللہ علیہ وآلہ وسلم) کے ساتھ میرا نکاح کر دو اور یہ عمر (رض) امّ سلمہ کے بیٹے تھے اور وہ ان دنوں ابھی بالغ بھی نہ تھے کیونکہ اسی روایت میں یہ بات بھی موجود ہے کہ امّ سلمہ (رض) نے جناب نبی اکرم (صلی اللہ علیہ وآلہ وسلم) کی خدمت میں عرض کیا کہ میں ایسی عورت ہوں جس کے یتیم بچے ہیں یعنی عمر اور زینب اور بچوں کو ولایت حاصل نہیں ہوتی لیکن اس کے باوجود انھوں نے عمر بن سلمہ کو نکاح کرنے کا اختیار دیا۔ چنانچہ انھوں نے نکاح کردیا اور جناب رسول اللہ (صلی اللہ علیہ وآلہ وسلم) نے اس کو جائز قرار دیا۔
پس عمر بن سلمہ اس نکاح میں وکیل کے قائم مقام قرار پائے تو گویا حضرت امّ سلمہ (رض) نے جناب نبی اکرم (صلی اللہ علیہ وآلہ وسلم) سے اپنا نکاح خود کیا آپ (صلی اللہ علیہ وآلہ وسلم) کا اس کے کسی ولی کا انتظار نہ کرنا۔ اس بات کی دلیل ہے۔ کہ امّ سلمہ اپنی بضع کی خود مالک تھیں ان کے ولی مالک نہ تھے اور اگر اس سلسلہ میں ان ولیاء کا کوئی حق یا اختیار ہوتا تو جناب رسول اللہ (صلی اللہ علیہ وآلہ وسلم) ان اولیاء کی اجازت سے پہلے ان کے حق کا اقدام نہ فرماتے۔
سوال : اس مقام پر ایک سوال ذہن میں ابھرتا ہے کہ جناب رسول اللہ (صلی اللہ علیہ وآلہ وسلم) تو ہر مؤمن پر اس کے اپنے نفس سے زیادہ حق والے ہیں۔
جواب تمہاری یہ بات بالکل درست ہے آپ (صلی اللہ علیہ وآلہ وسلم) کا حق مسلمانوں کی جان سے بھی زیادہ ہے اور ہر مؤمن اپنی بات کی نسبت آپ کی بات کو زیادہ مانتا ہے مگر آپ کے اولیٰ ہونے کا یہ مطلب نہیں کہ آپ کسی کی اجازت کے بغیر اس کا نکاح یا خریدو فروخت کرسکتے ہیں اس سلسلہ میں آپ کا معاملہ وہی ہے جو آپ کے بعد والے حکام کا ہے اور اگر یہ بات اسی طرح ہوتی (جس طرح تم نے سمجھی) تو حضرت عمر بن سلمہ (رض) کی وکالت جناب نبی اکرم (صلی اللہ علیہ وآلہ وسلم) کی طرف سے ہوتی حضرت امّ سلمہ (رض) کی طرف سے نہ ہوتی کیونکہ آپ ہی امّ سلمہ (رض) کے ولی ہوتے حالانکہ بات اس طرح نہیں اور یہ وکالت حضرت امّ سلمہ (رض) کی طرف سے تھی تو انھوں نے نکاح کیا اور جناب نبی اکرم (صلی اللہ علیہ وآلہ وسلم) نے اس نکاح کو قبول فرمایا تو یہ اس بات کی کھلی دلیل ہے کہ جناب نبی اکرم (صلی اللہ علیہ وآلہ وسلم) کو ان کی ملکیت بضع ان کے مالک بنانے سے حاصل ہوئی اس وجہ سے نہیں کہ آپ کو سب مؤمنوں پر حق ولایت حاصل تھا۔
کیا اس بات پر تم نے غور نہیں کیا کہ امّ سلمہ (رض) نے عرض کیا کہ میرا کوئی ولی یہاں موجود نہیں تو آپ نے ان سے فرمایا کہ ان میں سے کوئی بھی حاضر و غائب اس نکاح کو ناپسند نہ کرے گا۔ تو اگر جناب نبی اکرم (صلی اللہ علیہ وآلہ وسلم) ان اولیاء سے زیادہ ولایت رکھتے تو یہ بات نہ فرماتے بلکہ اس طرح فرماتے کہ تمہارا ولی میں ہوں۔ وہ نہیں ہیں۔ لیکن آپ نے حضرت امّ سلمہ (رض) کی بات کا انکار نہیں فرمایا اور ان کے جواب میں یہ فرمایا کہ تمہارے اولیاء اس کو ناپسند نہ کریں گے۔
آثار کے معانی کی تصحیح کے لحاظ سے تو یہ وضاحت ہے پس جب یہ بات ثابت ہوچکی کہ حضرت امّ سلمہ (رض) کا نکاح اولیاء کے بغیر اجازت جائز تھا تو ضروری ہے کہ جن روایات کو فریق اوّل نے) شروع میں ذکر کیا ہے ان کے معانی کو بھی اس پر محمول کیا جائے تاکہ ان روایات میں تضاد اور اختلاف اور منافات نہ رہے۔
نظر طحاوی (رح) :
اس مسئلہ پر غور و فکر کا تقاضا یہ ہے کہ ہم نے عورت کے بارے میں دیکھا کہ بلوغت سے پہلے اس کے بضع اور مال میں اس کے والد کو ولایت حاصل ہوتی ہے اور اس وقت عقد کا اختیار مکمل طور پر باپ کو حاصل ہوتا ہے نابالغہ کے ہاتھ میں نہیں ہوتا۔ اس سلسلہ میں تمام معاملات کا حکم ایک ہی ہوتا ہے اس میں اختلاف نہیں ہوتا پھر جب وہ بالغ ہوجاتی ہے تو اس بات پر سب کا اتفاق ہے کہ اس کے مال سے باپ کی ولایت اٹھ جاتی ہے اور اس کے مال کا عقد جو بچپن کی وجہ سے باپ کے اختیار میں تھا اب اس کی طرف لوٹ آتا ہے تو قیاس کا تقاضا یہ ہے کہ عقد بضع بھی اسی طرح ہو کہ بالغ ہونے کی وجہ سے باپ کے ہاتھ سے نکل جائے اور بلوغت سے پہلے جو اختیار والد کو حاصل تھا اب اس لڑکی کی طرف لوٹ آئے اور بلوغت کے بعد اس کے مال اور بضع کے سلسلہ میں اس کا حکم برابر ہو پس یہ اختیار خود اسے حاصل ہوگا والد کو نہیں اور جس طرح بلوغت سے پہلے اس کا حکم (مال و بضع) میں یکساں تھا بلوغت کے بعد بھی برابر ہو نظر کے اعتبار سے اس باب کا یہی حکم ہے اور امام ابوحنیفہ (رح) کا یہی مسلک ہے البتہ وہ اتنی بات مزید فرماتے ہیں کہ اگر عورت غیر کفو میں خود اپنا نکاح کرے تو ولی کو فسخ کا حق حاصل ہے اسی طرح اگر مہر کم رکھا جائے اور مہر مثل سے کم پر نکاح کرے تو ولی اس سلسلے میں مخاصمت کرسکتا ہے اس وقت تک وہ جھگڑا کرسکتا ہے یہاں تک کہ اس کا مہر اس کی ہم مثل لڑکیوں کے برابر ہوجائے۔
امام ابو یوسف (رح) کہا کرتے تھے کہ عورت کو اپنے بضع کی ولایت اپنا نکاح کرنے کے سلسلہ میں حاصل ہے پھر اگر وہ مہر مثل سے کم پر نکاح کرلیتی ہے تو ولی کو اعتراض کا حق حاصل نہیں ہے پھر انھوں نے اپنے اس قول سے رجوع کر کے ان لوگوں کے قول کو اختیار کرلیا جو لا نکاح الابولی کہ ولی کی اجازت کے بغیر نکاح نہیں ہوتا کے قائل ہیں۔ امام محمد (رح) کا قول بھی انہی کے موافق ہے۔ واللہ اعلم بالصواب۔