٤٢٢: ابن لہیعہ نے ابوالاسود سے نقل کیا کہ انھوں نے عروہ سے یہ بات سنی کہ وہ بسرہ (رض) سے اور بسرہ (رض) نے جناب نبی اکرم (صلی اللہ علیہ وآلہ وسلم) سے اسی طرح کی روایت نقل کی : من مس ذکرہ فلیتوضاء ۔ ان سے کہا جائے گا کہ ابن لہیعہ کی روایت سے تم کس طرح دلیل بناتے ہو جبکہ تم اس کو اپنے مخالفین کے لیے دلیل نہیں مانتے ہو جب یہ ان روایتوں کو بیان کرے جو تمہارے خلاف ہوں میرا مقصود اس سے ذرّہ بھر بھی عبداللہ بن ابی بکر اور ابن لہیعہ وغیرہ پر طعن کرنا نہیں بلکہ میرا مقصد مخالف کی زیادتی کو بیان کرنا ہے پس زہری کی حدیث کا کمزور ہونا اس شخص کی وجہ سے ہوا جو عروہ اور زہری کے درمیان داخل ہوا۔ اسی طرح زہری کی روایت کی کمزوری اور ہشام کی کمزوری جو کہ عروہ اور بسرہ کے درمیان ہے کیونکہ حضرت عروہ نے اس کو قبول نہیں کیا اور نہ توجہ دی اور حدیث تو اس سے کم درجہ کی تنقید سے ساقط ہوجاتی ہے۔ تو ان سے کہا جائے گا کہ یہ تمہاری طرف سے زیادتی کے لیے کافی ہے کہ تم اس جیسی روایت کو دلیل بناؤ۔
الجواب : یہ سند تو جناب لائے مگر اس میں ایک ایسا راوی ہے جو آپ کے ہاں بھی قابل احتجاج نہیں چہ جائیکہ آپ ہمارے الزام کے لیے اسے پیش کریں وہ ابن لھیعہ ہے۔
امام طحاوی (رح) فرماتے ہیں :
مجھے مندرجہ بالا بیان سے عبداللہ بن ابی بکر یا علی بن لھیعہ یا اور دیگر پر طعن مقصود نہیں بلکہ مستدلین کے ظلم کا ظاہر کرنا مقصود ہے کہ کتنی دھاندلی سے کام لیا گیا۔
روایت زہری کا ضعف اس واسطہ کے سبب ہوا جو عروہ اور ان کے درمیان پیش آیا اور پھر زہری و ہشام کی روایات کی کمزوری اس کے واسطہ کے سبب ہوئی جو عروہ اور بسرہ کے درمیان پیش آیا کیونکہ عروہ نے تو اس بات کو قبول ہی نہ کیا اور نہ اس کی طرف کان دھرا اور روایت تو اس سے کم درجہ کی علت سے ساقط الاعتبار ہوجاتی ہے۔
ایک اشکال :
اگر وہ اس روایت سے استدلال کریں روایت یہ ہے۔
ہشام نے یحییٰ بن ابی کثیر سے نقل کیا کہ یحییٰ نے ایک آدمی سے سنا جو مسجد رسول اللہ (صلی اللہ علیہ وآلہ وسلم) میں عروہ سے عن عائشہ عن النبی (صلی اللہ علیہ وآلہ وسلم) اسی طرح نقل کررہا تھا۔
الجواب :
یہ روایت جس کا راوی مجہول ہے وہ ہمارے خلاف کیسے حجت ہوسکتی ہے کیا یہ بےانصافی کی انتہا نہیں کہ جس قسم کی روایت کو خود قابل احتجاج نہیں سمجھتے اس کو ہمارے خلاف دلیل کے طور پر پیش کرتے ہو۔
ایک اور اشکال :
یہ روایت تو سابقہ قابل اعتراض روایت سے یکسر خالی ہے اور روایت بھی زید بن خالد الجھنی (رض) سے ہے۔