٤٤٠٠: شقیق نے عبداللہ بن مسعود (رض) سے روایت کی ہے کہ وہ آدمی جو اپنی باکرہ بیوی کو تین طلاق دے وہ عورت اس کے لیے اور خاوند سے نکاح کے بغیر حلال نہ ہوگی اس روایت کو سفیان نے براہ راست بھی شقیق عن انس ‘ عن عمر (رض) اسی طرح نقل کیا ہے۔ بندوں کو اس بات کا حکم ملا ہے کہ وہ عورتوں سے کچھ شرائط کی بنیاد پر نکاح کریں ان میں سے ایک شرط یہ ہے کہ ان عورتوں کی عدت کے دوران نکاح سے روکا۔ پس جو آدمی کسی عورت سے اس کی عدت کے دوران نکاح کرے اس کا اس سے نکاح بھی ثابت نہ ہوگا اور وہ نکاح نہ کرنے والوں کے حکم میں ہوگا۔ تو اس پر قیاس کا تقاضا یہ ہے کہ اگر وہ ایسے وقت میں طلاق دے جبکہ طلاق دینا منع ہے تو طلاق واقع نہ ہوگی اور وہ طلاق نہ دینے والوں کے حکم میں ہوگا۔ عقد نکاح کے متعلق جو کچھ لکھا گیا ان تمام عقود کا معاملہ تو اسی طرح ہے جن کے ذریعہ بندے کسی کام میں داخل ہوتے ہیں یعنی وہ صرف اسی صورت میں ہی اس کام میں داخل ہوتے ہیں جو حکم کے مطابق ہو مگر کسی کام سے نکلنے کی صورت میں مامور بہ طریقہ کے علاوہ بھی نکلا جاسکتا ہے۔ مثلاً ہم دیکھتے ہیں کہ بندوں کو حکم ہے کہ وہ نماز کو تکبیر اور ان اسباب و ذرائع سے شروع کرسکتے ہیں جن کے ذریعہ وہ نماز میں داخل ہوتے ہیں اور ان کو حکم ہے کہ سلام کے بغیر نماز سے نہ نکلیں اب جو شخص طہارت اور تکبیر کے بغیر نماز کو شروع کرے تو وہ نماز میں داخل شمار ہی نہ ہوگا اور جو شخص نماز میں ناجائز کلام کرے یا کوئی ایسا فعل کرے جو نماز میں کیا نہیں جاسکتا مثلاً کھانا ‘ پینا اور چلنا وغیرہ تو وہ ان میں سے کسی ایک کے ارتکاب سے نماز سے خارج ہوجاتا ہے۔ البتہ جو عمل اس سے دوران نماز کیا اس سے وہ گناہ گار ہوگا اسی طرح نکاح میں داخلہ کے لیے ان شرائط پر عمل ضروری ہے جس کا بندوں کو حکم دیا گیا مگر نکاح سے نکلنے کے لیے بعض اوقات تو وہی امور ہوتے ہیں جن کے ساتھ نکلنے کا حکم ملا اور بعض اوقات دیگر ایسے امور ذریعہ بن جاتے ہیں جن کا حکم نہیں دیا گیا (مثلاً بیک وقت تین طلاق وغیرہ) ۔ یہی امام ابوحنیفہ ‘ ابو یوسف ‘ محمد (رح) کا قول ہے۔