٤٤١٧: ابو سلمہ کہتے ہیں کہ مجھے فاطمہ بنت قیس (رض) نے بیان کیا کہ ابو عمرو بن حفص مخزومی نے مجھے تین طلاق دے دیں تو جناب رسول اللہ (صلی اللہ علیہ وآلہ وسلم) نے میرے لیے نفقہ کا حکم فرمایا۔ میں نے اس نفقہ کی مقدار کو قلیل قرار دیا اور جناب رسول اللہ (صلی اللہ علیہ وآلہ وسلم) نے میرے خاوند کو یمن بھیج رکھا تھا۔ چنانچہ خالد بن ولید (رض) بنی مخزوم کا ایک نمائندہ وفد لے کر جناب رسول اللہ (صلی اللہ علیہ وآلہ وسلم) کی خدمت میں حاضر ہوئے۔ اس وقت آپ حضرت میمونہ (رض) کے مکان پر تشریف فرما تھے۔ خالد نے کہا یارسول اللہ (صلی اللہ علیہ وآلہ وسلم) ! کہ ابو عمرو بن حفص نے فاطمہ کو طلاق ثلاثہ دے دی ہیں کیا اس کو نفقہ دیا جائے گا۔ تو جناب نبی اکرم (صلی اللہ علیہ وآلہ وسلم) نے فرمایا ۔ اس کو نہ نفقہ ملے گا اور نہ سکنیٰ ۔ آپ (صلی اللہ علیہ وآلہ وسلم) نے فاطمہ کی طرف پیغام بھیجا کہ ام شریک کے مکان میں منتقل ہوجاؤ۔ پھر اس کی طرف دوبارہ پیغام بھیجا کہ ام شریک کے مکان پر تو مہاجرین اولین آتے جاتے ہیں۔ پس تم ابن ام مکتوم (رض) کے مکان میں منتقل ہوجاؤ۔ کیونکہ اگر کسی وقت تم اپنا دوپٹہ گھر میں اتار بھی لو گی تو وہ نابینا ہونے کی وجہ سے تمہیں نہ دیکھ سکیں گے۔
تخریج : مسلم فی الطلاق ٤٤‘ ابو داؤد فی الطلاق باب ٣٩‘ نسائی فی النکاح باب ٢١‘ والطلاق باب ٧‘ مسند احمد ٦‘ ٤١٢؍٤١٤۔