٤٤٢١: ابوالزبیر مکی کہتے ہیں کہ میں نے عبدالحمید بن عبداللہ بن ابی عمرو بن حفص سے ابو عمرو کی طلاق کے متعلق دریافت کیا جو کہ انھوں نے فاطمہ بنت قیس کو دی تھی۔
تو عبدالحمید کہنے لگے انھوں نے طلاق بائنہ دی اور پھر ابو عمرو یمن چلے گئے اور انھوں نے وہاں سے عیاش بن ابی ربیعہ کو وکیل بنایا تو عیاش (رض) نے تھوڑا سا نفقہ اس کی طرف بھیجا اس پر وہ نالاں ہوئیں۔ عیاش کہنے لگے۔ ہمارے ذمہ تمہارا کوئی نفقہ نہیں اور نہ رہائش ہمارے ذمہ ہے جناب رسول اللہ (صلی اللہ علیہ وآلہ وسلم) تشریف رکھتے ہیں ان سے دریافت کرلو۔ چنانچہ میں نے جناب رسول اللہ (صلی اللہ علیہ وآلہ وسلم) سے سوال کیا جو عیاش نے کہا تھا تو آپ نے فرمایا۔ تمہارے لیے نفقہ و رہائش نہیں ہے لیکن دستور کے مطابق کھانا پینا ہے تم ان کے ہاں سے نکل جاؤ۔ فاطمہ کہنے لگی کیا میں ام شریک کے مکان پر چلی جاؤں ؟ آپ نے فرمایا اس کا گھر تو آنے جانے کی جگہ ہے۔ تم عبداللہ بن امّ مکتوم نابینا کے مکان میں منتقل ہوجاؤ وہ جگہ بہتر ہے۔
تخریج : مسلم فی الطلاق ٣٦‘ ابو داؤد فی الطلاق باب ٣٩‘ نسائی فی النکاح باب ٢٢‘ مالک فی الطلاق ٦٧۔