٤٤٥٢: ابوالزبیر کہتے ہیں کہ میں نے حضرت جابر (رض) سے سنا کہ میری خالہ کو طلاق بائن ہوگئی تھی انھوں نے اپنی کھجوریں توڑنے کا ارادہ کیا ان کو بعض آدمیوں نے ڈانٹا۔ تو وہ جناب رسول اللہ (صلی اللہ علیہ وآلہ وسلم) کی خدمت میں حاضر ہوئیں تو آپ نے فرمایا۔ کیوں نہیں۔ تم اپنی کھجوروں کو توڑ سکتی ہو اور ممکن ہے کہ تم صدقہ کرو اور کوئی اور نیک کام کرو۔ امام طحاوی (رح) فرماتے ہیں ایک جماعت اس بات کی طرف گئی ہے وہ فرماتے ہیں کہ مطلقہ اور بیوہ عدت کے دوران جہاں تک چاہیں سفر کرسکتی ہیں انھوں نے مندرجہ بالا روایات سے استدلال کیا ہے۔ دوسرے حضرات نے ان سے اختلاف کرتے ہوئے کہا کہ کہ بیوہ عورت اپنی عدت کے ایام میں گھر سے باہر جاسکتی ہے لیکن رات اپنے گھر میں گزارے گی اور مطلقہ عورت دن اور رات میں سے کسی وقت بھی گھر سے باہر نہیں نکل سکتی۔ انھوں نے ان دونوں کے حکم میں یہ فرق کیا ہے کیونکہ دوران عدت مطلقہ کا خرچہ اور رہائش خاوند پر واجب و لازم ہے۔ جس خاوند نے اسے طلاق دی ہے اس وجہ سے اسے گھر سے نکلنے کی چنداں حاجت و ضرورت نہیں ہوتی اور بیوہ کا معاملہ اس سے مختلف ہے اس کے لیے نفقہ نہیں ہے۔ پس وہ دن کی روشنی میں اللہ تعالیٰ کا فضل تلاش کرنے کے لیے جاسکتی ہے۔ ان کی دلیل حدیث جابر (رض) ہے۔ فریق اوّل نے جس روایت کو استدلال میں پیش کیا تو اس میں بالکل ممکن ہے کہ جو اس میں مذکور ہو وہ پہلے حکم ہو جبکہ پوری عدت میں سوگ نہ تھا اور یہ حکم پہلے اسی طرح تھا کہ تھوڑا سا وقت سوگ کے لیے خاص تھا۔ جیسا ان روایات میں معلوم ہوتا ہے۔
امام طحاوی (رح) کا قول : ایک جماعت اس بات کی طرف گئی ہے وہ فرماتے ہیں کہ مطلقہ اور بیوہ عدت کے دوران جہاں تک چاہیں سفر کرسکتی ہیں انھوں نے مندرجہ بالا روایات سے استدلال کیا ہے۔
فریق ثانی کا مؤقف : بیوہ عورت اپنی عدت کے ایام میں گھر سے باہر جاسکتی ہے لیکن رات اپنے گھر میں گزارے گی اور مطلقہ عورت دن اور رات میں سے کسی وقت بھی گھر سے باہر نہیں نکل سکتی۔ انھوں نے ان دونوں کے حکم میں یہ فرق کیا ہے کیونکہ دوران عدت مطلقہ کا خرچہ خاوند پر اور رہائش واجب و لازم ہے۔ جس خاوند نے اسے طلاق دی ہے اس وجہ سے اسے گھر سے نکلنے کی چنداں حاجت و ضرورت نہیں رہتی اور بیوہ کا معاملہ اس سے مختلف ہے اس کے لیے نفقہ نہیں ہے۔ پس وہ دن کی روشنی میں اللہ تعالیٰ کا فضل تلاش کرنے کے لیے جاسکتی ہے۔
روایت جابر (رض) کا جواب : فریق اوّل نے جس روایت کو استدلال میں پیش کیا اس میں اس بات کا قوی احتمال ہے کہ جو اس میں مذکور ہو وہ پہلے حکم ہو جبکہ پوری عدت میں سوگ نہ تھا اور یہ حکم پہلے اسی طرح تھا کہ تھوڑا سا وقت سوگ کے لیے خاص تھا۔ جیسا ان روایات سے معلوم ہوتا ہے۔