٤٤٧٠: زینب بنت کعب کہتی ہیں کہ فریعہ بنت مالک بن سنان (رض) نے بتلایا یہ ابو سعید خدری (رض) کی ہمشیرہ ہیں ان کو اپنے خاوند کی موت کی اطلاع ملی وہ اپنے بعض عجمی کسانوں کی تلاش میں نکلے تو انھوں نے ان کو اپنی کسیوں کی اطراف سے آلیا اور قتل کردیا۔
فریعہ کہتی ہیں کہ میں جناب رسول اللہ (صلی اللہ علیہ وآلہ وسلم) کی خدمت میں حاضر ہوئی اور میں نے عرض کی یارسول اللہ (صلی اللہ علیہ وآلہ وسلم) ! مجھے اپنے خاوند کی موت کی اطلاع ملی ہے اور میں انصار کے ایک ایسے مکان میں ہوں جو میرے قبیلہ کے مکانات سے فاصلہ پر واقع ہے میں اس میں بیٹھنا ناپسند خیال کرتی ہوں۔ مرحوم میرے لیے رہائشی مکان اور مال وراثت میں چھوڑ نہیں گیا اور کوئی خرچہ بھی نہیں جو مجھ پر خرچ کیا جائے اگر آپ کو پسند ہو تو میں اپنے بھائی کے ہاں رہوں تو ہمارا معاملہ اکٹھا ہوجائے گا اور یہ میری حالت کے لحاظ سے زیادہ مناسب و پسندیدہ ہے۔ آپ نے فرمایا اگر تو چاہتی ہے تو اپنے اہل کے ہاں چلی جا۔
فریعہ (رض) کہتی ہیں کہ میں اس سے خوش ہو کر وہاں سے نکلی یہاں تک کہ میں جب حجرہ ہی میں تھی یا مسجد میں پہنچی تھی کہ آپ (صلی اللہ علیہ وآلہ وسلم) نے مجھے آواز دی یا مجھے بلا بھیجا اور فرمایا تم نے کیا خیال کیا ؟ میں نے تمام بات دہرائی تو آپ (صلی اللہ علیہ وآلہ وسلم) نے فرمایا۔ تم اپنے اسی گھر میں ٹھہرو جہاں خاوند کی موت کی اطلاع ملی ہے۔ یہاں تک کہ عدت کا وقت پورا ہو۔ فریعہ (رض) کہتی ہیں کہ میں نے اسی گھر میں چار ماہ دس دن گزارے۔ حضرت عثمان (رض) نے (زمانہ خلافت میں) میری طرف پیغام بھیج کر مسئلہ دریافت کیا تو میں نے ان کو اطلاع دی پس عثمان (رض) نے اس کے مطابق فیصلہ کردیا۔