٤٦٥٤: خولہ بنت مالک بن ثعلبہ جو کہ عبادہ بن صامت کی بھتیجی ہیں وہ روایت کرتی ہیں کہ جناب رسول اللہ (صلی اللہ علیہ وآلہ وسلم) نے میرے خاوند کی اس وقت ایک فرق کھجور سے اعانت فرمائی جبکہ اس نے مجھ سے ظہار کیا اور ایک فرق سے میری اعانت فرمائی اور یہ ساٹھ صاع ہوگئے پھر جناب رسول اللہ (صلی اللہ علیہ وآلہ وسلم) نے فرمایا ان کو صدقہ کر دو اور فرمایا تم اللہ تعالیٰ سے ڈرو اور اپنے خاوند کی طرف لوٹ آؤ۔
تقاضاء نظر : تمام کفارات میں اطعام مسکین گندم کا نصف صاع اور کھجور کا ایک صاع ہونا قیاس و نظر کا تقاضا ہے جناب رسول اللہ (صلی اللہ علیہ وآلہ وسلم) کے اصحاب (رض) کی ایک جماعت سے یہ ثابت ہے۔