٤٨١٥: قتادہ نے انس بن مالک (رض) سے انھوں نے جناب نبی اکرم (صلی اللہ علیہ وآلہ وسلم) سے روایت کی ہے کہ ایک آدمی کو جناب نبی اکرم (صلی اللہ علیہ وآلہ وسلم) کے پاس لایا گیا آپ (صلی اللہ علیہ وآلہ وسلم) نے حکم فرمایا تو اس کو کھجور کی دو شاخوں سے قریباً چالیس ضربات ماری گئیں پھر ابوبکر (رض) نے بھی ایسا ہی کیا۔ پھر جب حضرت عمر (رض) کا زمانہ آیا تو انھوں نے صحابہ کرام (رض) سے مشورہ کیا تو حضرت عبدالرحمن بن عوف (رض) نے کہا اے امیرالمؤمنین ! سب سے کم درجہ کی حد اسی کوڑے ہیں چنانچہ آپ نے اسی طرح کردیا۔ اس سارے کلام سے یہ بات ثابت ہوئی کہ شراب کی حد میں ایک مقررہ مقدار حضرت عمر (رض) سے شروع ہوئی اور جس پر وہ آ کر رکے وہ اسی کوڑے تھے اور اس سلسلہ میں ان میں سے کسی ایک نے بھی اختلاف نہیں کیا۔ پس اب کسی کو مناسب نہیں کہ وہ اس کو چھوڑ کر اس کے خلاف کہے کیونکہ اصحاب رسول اللہ (صلی اللہ علیہ وآلہ وسلم) کا اجماع حجت ہے اس لیے کہ وہ وہم اور لغزش سے بچے ہوئے تھے۔ وہ اسی طرح ہیں جیسے وہ وہم و لغزش سے بری روایت نقل کریں پس جس طرح ان میں سے ہر ایک کی نقل کردہ روایت حجت ہے۔ کسی کو اس کی مخالفت جائز نہیں تو اسی طرح ان تمام کا اجتہاد جو انھوں نے بالاتفاق کیا وہ حجت ہے کسی کو اس کی مخالفت جائز نہیں۔