٤٨١٨: عبداللہ بن یزید نے عبداللہ بن عمرو سے روایت کی ہے کہ جناب نبی اکرم (صلی اللہ علیہ وآلہ وسلم) نے فرمایا جس نے شراب کا ایک گھونٹ پیا تم اس کو اسی کوڑے مارو۔ یہ وہ روایت ہے جس سے شراب کی حد کے اسی کوڑے ہونے پر اطلاع ملی ہے اگر یہ روایت ثابت ہوجائے تو اس سے اسی کوڑے خود جناب نبی اکرم (صلی اللہ علیہ وآلہ وسلم) سے ثابت ہوجائیں گے اور اگر یہ ثابت نہ ہو سکے تو پھر اصحاب رسول اللہ (صلی اللہ علیہ وآلہ وسلم) سے اسی کوڑوں کی سزا ثابت ہے جیسا کہ ہم پہلے ذکر کر آئے ہیں کہ ان کا اتفاق ہے انھوں نے کم از کم حد کو سامنے رکھ کر اجتہاد کیا ہے تو یہ ان کا اجماع ہے جبکہ پہلے اس کے خلاف حکم تھا جیسا کہ انھوں نے ام ولد لونڈیوں کی فروخت اور نماز جنازہ کی تکبیرات پر اجماع کیا ہے جبکہ پہلے اس کے خلاف تھا تو جس طرح ام ولد لونڈیوں کی خریدو فروخت ترک کرنے میں ان کی مخالفت جائز نہیں اسی طرح شراب کی حد کے سلسلے میں اسی کوڑے مقرر کرنے میں ان کی مخالفت جائز نہیں۔ یہی امام ابوحنیفہ ‘ ابو یوسف ‘ محمد (رح) کا قول ہے۔
حاصل روایت :: شراب کی حد جناب رسول اللہ (صلی اللہ علیہ وآلہ وسلم) سے توقیفی نہیں بلکہ صحابہ کرام کے اجتہاد اور اجماع سے ثابت ہے اس کی خلاف ورزی جائز نہیں۔