٤٨٩٣: ابو قلابہ نے حضرت انس (رض) سے روایت کی ہے کہ عکل قبیلہ کے آٹھ آدمی آئے مدینہ منورہ کی آب و ہوا کے موافق نہ آنے کی وجہ سے وہ بیمار ہوگئے۔ جناب رسول اللہ (صلی اللہ علیہ وآلہ وسلم) نے ان کو اونٹوں کے گلہ کی طرف بھیجا پس انھوں نے ان کے دودھ استعمال کئے۔ جب وہ صحت یاب ہوگئے تو اسلام سے پھرگئے اور انھوں نے اونٹوں کے چرواہے کو قتل کیا اور اونٹوں کو ہانک کرلے گئے۔ جناب رسول اللہ (صلی اللہ علیہ وآلہ وسلم) نے ان کے پیچھے آدمی بھیجے ان کو پکڑ لیا گیا اور ان کے ہاتھ پاؤں کاٹ دیئے گئے اور ان کی آنکھوں میں گرم سلاخیں لگائی گئیں اور ان کو (میدان میں) اسی حالت میں چھوڑ دیا گیا یہاں تک کہ وہ مرگئے۔
تخریج : بخاری فی الحدود باب ١٥‘ (المحاربین باب ١) مسلم فی القسامۃ ٩‘ ١٤‘ ابو داؤد فی الحدود باب ٣‘ ترمذی فی الطہارۃ باب ٥٥‘ نسائی فی التحریم باب ٧‘ ٨‘ ٩‘ ابن ماجہ فی الحدود باب ٢٠‘ مسند احمد ٣‘ ١٦٣؍١٧٧‘ ١٩٨۔
لغات : عکل۔ ایک عرب قبیلہ ہے۔ استوخم۔ ہوا کا موافق نہ ہونا۔ ذود۔ تین سے دس تک اونٹ۔ بعث۔ مقرر کرنا۔ بھیجنا۔ آثار۔ نشان قدم۔ سمل گرم سلاخ کا آنکھ میں لگانا۔