٤٩٧٨: حمیدالطویل نے حضرت انس (رض) سے نقل کیا ہے کہ جناب نبی اکرم (صلی اللہ علیہ وآلہ وسلم) جب کسی قوم سے جہاد کرتے تو صبح ہونے تک ان پر حملہ نہ کرتے پس اگر اذان کی آواز سن پاتے تو حملے سے رک جاتے اور اگر اذان کی آواز نہ سنتے تو حملہ کردیتے۔ پس ہم خیبر میں اترے جب صبح ہوئی اور آپ نے اذان نہ سنی تو آپ بھی سوار ہوئے اور ہم بھی سوار ہوئے میں ابو طلحہ (رض) کے پیچھے سوار ہوا اور میرا پاؤں جناب رسول اللہ (صلی اللہ علیہ وآلہ وسلم) کے پاؤں کو چھو رہا تھا۔ پھر ہمارا سامنا خیبر کے مزدوروں سے ہوا وہ اپنی کدالیں اور ٹوکرے لیے نکلے۔ جب انھوں نے جناب نبی اکرم (صلی اللہ علیہ وآلہ وسلم) اور لشکر کو دیکھا تو کہنے لگے یہ تو محمد (صلی اللہ علیہ وآلہ وسلم) لشکر سمیت آئے ہیں اور پیٹھ پھیر کر بھاگ کھڑے ہوئے۔ جناب نبی اکرم (صلی اللہ علیہ وآلہ وسلم) نے نعرہ تکبیر بلند کرتے ہوئے فرمایا خیبر برباد ہوگیا۔ بیشک جب ہم کسی قوم کی زمین پر اترتے ہیں تو ڈرائے ہوئے لوگوں کی صبح بری ہوتی ہے۔
تخریج : بخاری فی الاذان باب ٦‘ صلوۃ الخوف باب ٦‘ الجہاد باب ١٣٠‘ والمناقب باب ٢٨‘ المغازی باب ٣٨‘ مسلم فی الجہاد ١٢٠؍١٢١‘ ترمذی فی السیر باب ٣‘ نسائی فی الصید باب ٧٨‘ مالک فی الجہاد ٤٨‘ مسند احمد ٣‘ ١١١؍١٦٤‘ ٢٤٦؍٢٦٣۔