٤٩٩٢: یعقوب بن عبدالرحمن زہری اپنے والد اور وہ اپنے دادا سے بیان کرتے ہیں کہ جب حضرت سعد اور ابو موسیٰ (رض) نے تستر فتح کرلیا تو ابو موسیٰ (رض) نے ایک قاصد حضرت عمر (رض) کی خدمت میں بھیجا پھر انھوں نے طویل روایت بیان کی۔ راوی کہتے ہیں پھر حضرت عمر (رض) قاصد کی طرف متوجہ ہوئے اور فرمایا کیا تمہارے پاس کوئی ظاہر خبر ہے ؟ اس نے کہا جی ہاں ! اے امیرالمؤمنین ہم نے ایک عرب کو پکڑا جس نے اسلام کے بعد کفر اختیار کرلیا تھا تو عمر (رض) نے پوچھا۔ تم نے اس کا کیا کیا ؟ اس نے بتلایا ہم نے اس کو سامنے بلایا پھر اس کی گردن اڑا دی۔ حضرت عمر (رض) نے پوچھا کیا تم نے اس کو کسی گھر میں داخل نہ کیا پھر تم اس کا دروازہ بند کردیتے اور تین دن کا کھانا اس کی طرف پھینک دیتے۔ شاید وہ توبہ کرلیتا یا اللہ تعالیٰ کے حکم کی طرف لوٹ آتا۔ پھر یہ دعا کی۔ اے اللہ میں نے ان کو یہ حکم نہیں دیا اور میں وہاں موجود بھی نہ تھا اور جب یہ معاملہ مجھے پہنچا تو میں اس پر راضی بھی نہیں ہوا۔