٤٩٩٥: ابو وائل کہتے ہیں کہ مجھے ابن مغیرہ السعدی نے بیان کیا کہ میں سحری کے وقت اپنے گھوڑے کی تلاش میں نکلا میرا گزر بنو حنفیہ کی مسجد کے پاس سے ہوا میں نے سنا کہ وہ گواہی دے رہے ہیں کہ مسیلمہ اللہ کا رسول ہے۔ راوی کہتا ہے کہ میں وہاں سے لوٹ کر عبداللہ بن مسعود (رض) کی خدمت میں آیا اور میں نے ان کے سامنے ان کا واقعہ ذکر کیا۔ انھوں نے پولیس کو بھیجا اور وہ پکڑ لیے گئے اور ان کو لایا گیا انھوں نے توبہ کی اور اپنی باتوں سے رجوع اختیار کیا اور کہنے لگے دوبارہ ایسا نہ کریں گے۔ پس ان کا راستہ چھوڑ دیا گیا۔ ان میں سے ایک آدمی آیا جس کا نام عبداللہ بن نواحہ تھا اس کی گردن اڑا دی گئی۔ لوگوں نے کہا تم نے ایک جماعت کو ایک ہی معاملے میں پکڑا پس بعض کو بالکل چھوڑ دیا اور بعض کو تم نے قتل کردیا تو انھوں نے بتلایا کہ میں جناب رسول للہ (صلی اللہ علیہ وآلہ وسلم) کی خدمت میں حاضر تھا کہ ابن نواحہ ایک اور آدمی کے ساتھ آیا۔ اس آدمی کو حجر بن وثال کہتے تھے یہ دونوں مسیلمہ کی طرف سے وفد بن کر آئے تھے۔ جناب رسول اللہ (صلی اللہ علیہ وآلہ وسلم) نے فرمایا کیا تم دونوں گواہی دیتے ہو کہ میں اللہ کا رسول ہوں ؟ دونوں کہنے لگے کیا تم گواہی دیتے ہو کہ مسیلمہ اللہ کا رسول ہے ؟ آپ نے ان کو فرمایا ” اٰمنت باللہ ورسولہ “ اگر میں کسی وفد میں آنے والے کو قتل کرتا تو تم دونوں کو قتل کروا دیتا۔ اسی وجہ سے میں نے اس کو قتل کیا ہے۔ حضرت ابن مسعود (رض) نے ابن نواحہ کو قتل کردیا اور اس کی توبہ کو قبول نہ کیا اس لیے کہ ان کو علم تھا کہ یہ اس کی عادت ہے کہ جب اس پر قابو پا لیا جائے توبہ کا اظہار کرتا ہے اور جب اس کو الگ چھوڑو تو دوبارہ کفر کی طرف لوٹ جاتا ہے۔
تخریج : دارمی فی السیر باب ٦٠‘ مسند احمد ١؍١٠٤۔
حضرت ابن مسعود (رض) نے ابن نواحہ کو قتل کردیا اور اس کی توبہ کو قبول نہ کیا اس لیے کہ ان کو علم تھا کہ یہ اس کی عادت ہے کہ جب اس پر قابو پا لیا جائے توبہ کا اظہار کرتا ہے اور جب اس کو الگ چھوڑو تو دوبارہ کفر کی طرف لوٹ جاتا ہے۔