٤٩٩٩: عمار بن ابی معاویہ دھنی نے ابوالطفیل سے روایت کی کہ کچھ لوگ مرتد ہوگئے وہ پہلے نصرانی تھے حضرت علی (رض) نے ان کی طرف معقل بن قیس تیمی کو بھیجا اور ان کو فرمایا جب میں سر کھجاؤں تو لڑنے والوں کو قتل کر دو اور ان کی اولاد کو قید کرلو۔ ان میں سے ایک گروہ کو لایا گیا آپ نے پوچھا تم کون ہو ؟ انھوں نے کہا ہم لوگ پہلے نصرانی تھے ہمیں نصرانیت اور اسلام میں اختیار دیا گیا تو ہم نے اسلام کو اختیار کرلیا پھر ہم نے دیکھا کہ کوئی دین ہمارے دین سے افضل نہیں ہے جس پر کہ ہم پہلے تھے پس ہم نصرانی ہوگئے۔ حضرت علی (رض) نے اپنا سر کھجایا تو ان میں سے لڑنے والوں کو قتل کردیا گیا اور ان کی اولاد کو قیدی بنا لیا گیا۔ حضرت عمار (رض) کا بیان ہے کہ مجھے ابو شعبہ نے بتلایا کہ حضرت علی (رض) کے پاس ان کی اولاد کو لایا گیا تو آپ نے اعلان فرمایا۔ ان کو کون مجھ سے خریدے گا ؟ مصقلہ بن ہبیرہ شیبانی نے ان کو حضرت علی (رض) سے ایک لاکھ درہم کے بدلے خرید لیا۔ اس نے پچاس ہزار ادا کئے تو حضرت علی (رض) نے فرمایا میں مکمل مال لوں گا۔ اس نے مال کو اپنے گھر میں دفن کیا اور ان کو آزاد کردیا اور امیر معاویہ (رض) کے پاس چلا گیا۔ حضرت علی (رض) نے ان کے عتق و آزادی کو برقرار رکھا۔
نوٹ : اس باب میں دو مسائل ذکر کئے کفار کو دعوت دے کر ان سے لڑائی کی جائے گی یا دعوت کی اب حاجت نہیں ‘ مرتد کو دعوت دی جائے گی یا نہیں صحابہ کرام کے اقوال سے دونوں باتیں دعوت دینا اور کبھی نہ دینا دونوں ثابت ہے۔ موقعہ کے مناسب اختیار کیا جائے۔ جناب رسول اللہ (صلی اللہ علیہ وآلہ وسلم) کا عمل بھی اسی پر دال ہے۔ (مترجم)